Eis Diretór Planeamentu Ministériu Administrasaun Estatál (MAE), Belarmino Filomeno Neves. Imajen/Osória Marques

DILI, 19 setembru 2019 (TATOLI)-Atu bele iha serbisu efikásia no efisiénsia iha instituisaun Estadu nian no kontribui ba polítika reforma lejizlativu, Belarmino Filomeno Neves, nu’udar eis Diretór Planeamentu Ministériu Administrasaun Estatál (MAE) rekomenda atu hamenus diresaun sira ne’ebé iha dupla funsaun.

Liu husi workshop ne’ebé organiza husi Ministériu Reforma Lejizlativa no Asuntu Parlamentár (MRLAP), kuarta (18/09/2019), iha salaun Ministériu Solidariedade, Sosiál no Inkluzaun (MSSI), eis  Diretór  Jerál Institutu Nasionál Administrasaun Públika (INAP-sigla Portugés)  ne’e friza katak,  diresaun lubuk ida iha Governu nia laran mak halo servisu dupla no atu hanesan de’it, tanba ne’e presiza reforma instituisaun sira ne’e.

Nia hateten, diresaun boot ho dupla funsaun ne’e  afeta  ba gastu orsamentu estadu tanba habokur de’it estrutura instituisaun no hafraku funsaun.

“Tenke reforma uluk institusionál tanba diresaun barak liu, maibé serbisu uitoan de’it,” nia hateten.

Nia mós sujere Governu tenke hanoin ona  hodi   implementa lei Komisaun Funsaun Públika (CFP-sigla portugés) númeru 8/2016 no dekretu Lei 25/2016  atu asume kargu Xefia hanesan diretór ho nivel IV, Diretór Nasionál Nivel  V no Diretór Jerál Nivel VI.

Tuir nia observasaun  durante ne’e akontese kontradís ho lei no dekretu lei ne’e , tanba substituisaun ba kargu diretór jerál prolonga to’o tinan no dala barak akontese lider polítika sira hasai no hatama ema la tuir méritu.

Atu asegura  serbisu no hasae prestasaun funsaun públika nian, Governu tenke implementa ona dekretu Lei 27/2008, altera ba dekretu   20/2011 no kontinua altera ba dekretu lei 25/2016 kona-ba rejime ba kargu Xefia ba diresaun sira iha instituisaun públika.

Nia rekomenda mós  tenke  reforma  sistema no prosedimentu ne’ebé mak la kondís ho Lei no padronizasaun tenke reforma no ikus Mak reforma teknolojia tanba mundu agora governu eletróniku.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here