Ministru Negósiu Estranjeiru no Kooperasaun, Dionísio da Costa Babo Soares. Imajen/TATOLI

DILI, 19 setembru 2019 (TATOLI) – Governu Timor-Leste (TL) kontinua halo esforsu hodi prepara fatin ba Embaixada TL nian iha Estadu Unidu Amérika (EUA).

Ministru Negósiu Estranjeiru no Kooperasaun, Dionísio da Costa Babo Soares hato’o asuntu ne’e, hafoin halo audiénsia ho Prezidente Repúblika, Francisco Guterres Lú Olo iha Palásiu Prezidente Bairru Pité, ohin.

Dionísio hateten kona-ba fatin embaixada iha EUA, Governu kontinua trata no Konsellu Ministru mós aprova ona katak sira hakarak atu fó kontratu ida ba tinan naruk ho presu ne’ebé Governu mós aseita.

Entaun, nia haktuir, MNEK konkorda no haree tiha ona kontratu ne’e, Ministru Justisa mós ko’alia ona, atu haree humutuk hodi rezolve asuntu ne’e.

“Prosesu ne’e mak sei la’o hela. Hotu ona mak Governu TL sei asina, maibé ne’e normál tanba iha diplomasia labele ansi. Rezolve buat ruma tenke ho kalma no labele prejudika fali Governu tanba ne’e problema negosiasaun ne’ebé tenke fó vantajen ba parte rua iha futuru,” nia informa.

Nia husu ba maluk sira atu labele rona demais informasaun iha mídia sosiál no jornalista sira rona karik, verifika ho ministériu relevante.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here