Xefe Estadu Maiór Jenerál F-FDTL, Majór Jenerál Lere Anan Timur ho Embaixadora Estadus Unidos Amerika ba Timor-Leste, Katleen Fitzpatrick inagura kuzina F-FDTL ne’ebé harii husi Forsa Marina Amerika nian. Imajen/Eugénio Pereira

METINARO, 19 setembru 2019 (TATOLI)-  Komandu FALINTIL- Forsa Defeza Timor-Leste apresia durante tinan hitu (7) nia laran kooperasaun ezersísiu “Harii Hamutuk” forsa nasaun haat, Timor-Leste, Austrália, Japaun, no Amerika lori progresu pozitivu ba dezenvolvimentu rekursu umanu no infraestrutura F-FDTL.

Xefe Estadu Maiór Jenerál FALINTIL-FDTL, Majór Jenerál Lere Anan Timur, apresia forsa nasaun haat hatudu ba mundu katak, forsa maka sai ezemplár atu haklaken dame iha povu no nasaun no ajuda povu liu husi serbisu ne’ebé sira prodús.

“Ha’u agradese ezersísiu harii hamutuk ne’e lori vantajen boot, primeiru fó kapasitasaun ba ita nia militár sira iha área enjeñaria, segundu apoiu umanitária ajuda ita nia povu, hadi’a eskola no hariis fatin sira. Entaun ha’u dehan ba Amerika, Japaun, China, Austrália ne’e jestu di’ak ba país ki’ik katak forsa mai lori dame no lori dezenvolvimentu,” hateten Lere ba jornalista, hafoin ensera ezersísiu “Harii Hamutuk’ iha Sentru Treinamentu F-FDTL, Metinaro, Dili.

Majór Lere dehan, ko’alia ona ho lider militár sira husi Amerika, Austrália ba oin atu envolve nasaun Nova Zelándia no Indonézia envolve tan iha ezersísiu Harii Hamutuk iha futuru mai.

Fatin hanesan, Komandante Primeiru Divizaun Forsa Austrália Majór Jenerál Justin “Jake” Elwood, sente orgullu iha tinan 2000 nia mai hola parte iha misaun INTERFET  no ohin loron fila fali mai Timor-Leste haree progresu dezenvolvimentu barak harii ona Komandu F-FDTL.

Majór Jenerál Justin “Jake” mós agradese kooperasaun ezersisiu Harii Hamutuk halo ona servisu formasaun no progresu servisu barak tebes.

“Ha’u haree treinamentu Harii Hamutuk halo ona buat barak, ha’u agradese ho kooperasaun ida ne’e hanesan susesu ida mai ami, (militár) no ba ami nia nasaun (Austrália) no ita hotu nia koopera atu kontinua,” nia afirma.

Tuir nia haree, F-FDTL iha ona progresu barak, kompara ho tempu ukun aan iha 2000 no ohin halo tina 20 ona, Timor-Leste kria mós kooperasaun di’ak ho forsa nasaun barak hodi ajuda dezenvolve F-FDTL.

Nia hatutan, Austrália sei kontinua fó apoiu ba F-FDTL tuir akordu kooperasaun ne’ebé halo ona entre governu no forsa defeza rai rua nian.

Embaixadóra Estadus Unidus Amerika mai Timor-Leste, Katleen Fitzpatrick, agradese tebes treinamentu Harii Hamutuk  nu’udar kooperasaun militár, Amérika, Austrália no Japaun atu fahe esperiénsia no ajuda dezenvolvimentu F-FDTL.

Nia dehan, husi parte Forsa Marima Amerika kuaze 200 iha tinan 2019 konklui ona sira nia formasaun ba forsa F-FDTL oinsá hasoru kombate, no formasaun iha área enjeñaria, konstrusaun ba koziña ba F-FDTL iha Metinaro.

“Tinan ne’e ezersísiu Harii Hamutuk konklui ona membru militár 200 serbisu hamutuk durante fulan ida hodi treina no kolabora iha projetu enjeñaria, konstrusaun no kombate, no ohin inaugura ona kaza de bañu no eskola oteleiru no turizmu ida iha Bekora no membru ezersísiu sira kompleta mós obra koziña iha Metinaro,” dehan Katleen.

Katleen hatutan, membru F-FDTL hanesan mós komunidade lokál sira hetan benefísiu boot husi kooperasaun serbisu ne’ebé kria no prodús obra infraestrutura barak loos.

Embaixadóra Katleen orgullu seksaun integradu forsa haat koopera malu di’ak tebes hodi prontu kualkér oras bainhira estadu ka povu presiza sira nia ajuda iha área kontrusaun.

Entretantu, Reprezentante Embaixador Japaun ba Timor-Leste, Shigo Higashimoto deklara Japaun agradese bele hola parte iha treinamentu Harii Hamutuk hodi fahe esperensia ba membru F-FDTL.

Governu Japaun sei kontinua suporta nia militár sira hodi envolve nafatin iha ezersísiu ne’e hodi fó progresu  dezenvolvimentu Timor-Leste.

Iha tinan 2002 too 2004, Governu Japaun nia forsa 2300  mai hala’o misaun iha Timor hodi kontribui ba dezenvolvimentu iha setór infraestrutura, estrada, bee moos no harii ponte no seluk tan.

“Governu Japaun komprometidu atu kontinua apoiu harii nasaun Estadu Timor-Leste iha setór oin-oin no setór defeza nian,” tenik nia.

Inaugura Koziña F-FDTL

Iha parte seluk, Xefe Estadu Maiór Jenerál FALINTIL-FDTL, Majór Jenerál Lere Anan Timur, Embaixadóra Estadus Unidus Amerika ba Timor-Leste, Katleen Fitzpatrick no Komandante Primeiru Divizaun Forsa Austrália Majór Jenerál Justin “Jake” Elwood hala’o inaugurasaun ba koziña F-FDTL ne’ebé harii husi Forsa Marina Amerika nian.

Ikus liu, Komandante Sentru Formasaun Terrenu (SFT), Tenente Koronél, Cesário Marçal Ximenes “Haksolok” entrega mós tais Timor ba komandante forsa Australia, Amerika, Australia no Japaun ne’ebé durante tinan hitu koopera servisu iha ezersísiu Harii Hamutuk. 

Jornalista : Eugébio Peraira 

Editòr      : Francisco Simóes

HAKEREK NO HATÁN

Please enter your comment!
Please enter your name here