Enkontru entre Prezidente Repúblika, Francisco Guterres Lú Olo no Ministru Negósiu Estranjeiru no Kooperasaun, Dionísio da Costa Soares Babo, ohin, iha Palásiu Prezidente Nicolau Lobato. Imajen Mídia PR

DILI, 19 setembru 2019 (TATOLI) – Ministru Negósiu Estranjeiru no Kooperasaun (MNEK), Dionísio da Costa Soares Babo sei reprezenta Governu hodi partisipa iha Asembleia Jerál Nasaun Unida (ONU) ba dala 74, iha Nova Iorke, semana oin.

Tanba ne’e, ohin, Dionísio marka audiénsia ho Prezidente Repúblika (PR), Francisco Guetrres Lú Olo hodi ko’alia kona-ba relasaun ho Ministériu Negósiu Estranjeiru (MNEK) nia partisipasaun ne’e, hafoin Parlamentu Nasionál (PN) la aprova viajen PR.

“Marka audiénsia ho PR hodi ko’alia kona-ba MNEK nia partisipasaun lori Governu nia naran ba Asembleia Jerál Nasaun Unida no PR labele ba tanba PN impede”, Dionísio hateten hafoin audiénsia ho PR Lú Olo iha Palásiu Prezidente Nicolau Lobato, Bairru Pité.

Durante audiénsia, Dionísio husu Xefe Estadu nia hanoin kona-ba pontu importante ka mensájen saida mak hakarak atu hato’o iha Nasaun Unida liliu iha relasaun simeira tolu ne’ebé sei organiza iha ne’ebá.

Simeira tolu ne’e mak hanesan mudansa klimátika, asesu universál saúde ho edukasaun ne’ebé iha relasaun ho Objetivu Dezenvolvimentu Sustentável (ODS).

Maski la partisipa, hanesan Xefe Estadu, Lú Olo fó hanoin katak saida mak Timor-Leste (TL) presiza atu re-inteira iha simeira ne’ebé sei hala’o durante semana 1 to’o loron 10 nia laran iha Nasaun Unida.

Aleinde partisipa iha eventu ne’e, sei halo mós enkontru bilaterál lubuk ida no partisipa mós enkontru Fórum CPLP, G7+ no sei akontese atividade lubuk ida durante Asembleia Jerál Nasaun Unida.

PR laiha mensájen espesífika, maibé alerta de’it kona-ba tópiku sira ne’ebé mak sei hala’o iha simeria nível altu ne’ebé fó bazeia maka’as ba edukasaun, asesu universál saúde no mudansa klimátika ne’ebé afeta tebes rai ne’e.

Mudansa klimátika afeta tanba agora tasi moos laloran kontinua boot, ne’ebé nia impaktu ne’e mai hosi nasaun industrializada sira kona-ba poluisaun, gastu plástiku, rezidu no lixu sira ne’ebé bele estraga ambiente.

Impaktu ambientál ne’e klaru katak mai hosi nasaun industrializada no nasaun ki’ik sira mak tenke hetan konsekuénsia.

PR rasik informa katak iha Timor-Leste (TL) kestaun mudansa klimátika ne’e tenke haree oinsá agrikultura ne’e bele la’o di’ak, prodúz aihan barak ba povu no oinsá iha futuru bele prevene nível tasi ne’ebé sa’e la afeta ba área kostál nian.

PR mós ko’alia kona-ba importánsia saúde nian ne’ebé iha relasaun ho Timor-Leste nia planu konkretu iha 2020 ne’ebé TL sei lansa planu atu tau meiu konkretu oinsá kombate problema saúde no importante liu mak halo saúde ne’e asesível ba maluk timoroan tomak.

Iha pontu ikus ne’ebé PR fó hanoin, kona-ba importánsia edukasaun liliu oinsá fó atensaun ba aumenta nível kualidade atu aposta ba oan sira no hanesan nasaun ki’ik ida hanesan Timor-Leste inklui nasaun sira seluk.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here