Ministra Defeza Austrália, Linda Reynold, bainhira hala'o enkontru ho Prezidente Repúblika, Francisco Guterres Lú Olo. Foto Mídia PR

DILI, 19 setembru 2019 (TATOLI) – Prezidente Repúblika, Francisco Guterres Lú Olo, simu vizita kortézia Ministra Defeza Austrália, Linda Reynolds, kinta ne’e, iha Palásiu Prezidente Nicolau Lobato, Bairru Pité.

Xefe Estadu agradese apoiu tomak ne’ebé Governu Austrália oferese mai Timor-Leste, hahú kedas hosi prezensa International Force for East Timor (INTERFET) lidera hosi Peter Cosgrove ba manuntensaun pás.

Iha biban ne’e, Ministra Defeza, Linda Reynolds, ko’alia ho Prezidente Repúblika kona-ba kooperasaun entre nasaun rua, liliu iha área militár.

Ministra Defeza ne’e informa katak nia sei hala’o soru-mutuk ho Ministru Defeza, Filomeno da Paixão de Jesus atu ko’alia liután kooperasaun iha área defeza nian.

Ministra Defeza rejista no rekoñese progresu di’ak iha área defeza no seguransa no nu’udar belun di’ak orgullu haree Timor-Leste sai nasaun demokrátiku, forte no hakmatek.

Progresu sira ne’e sei hametin liután relasaun entre nasaun rua.

Linda dehan Tratadu Fronteira Marítima ne’ebé nasaun rua asina hatudu katak iha kolobarosaun hamutuk atu asegura liután seguransa tasi hasoru peska illegál no tráfiku umanu.

Entretantu, Xefe Estadu espera katak nu’udar nasaun viziñu kooperasaun entre Austrália no Timor-Leste (TL) sei metin liután.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here