Sesaun plenária Parlamentu Nasionál. Imajen dok. Tatoli

DILI, 17 setembru 2019 (TATOLI) – Membru Parlamentu Nasionál (PN) konsidera viajen estranjeiru bele lori referénsia di’ak ba diskusaun lei sira, tanba ne’e presiza mantein iha orsamentu privativu PN nian, iha Orsamentu Jerál Estadu (OJE) 2020.

Tuir proposta orsamentu privativu Parlamentu nian, viajen estranjeiru prevee $3.006.667, enkuantu viajen lokál ho orsamentu $656.440.

Iha diskusaun no votasaun iha tersa kalan, proposta númeru 24 ne’ebé aprezenta husi Komisaun B (Defeza, Seguransa no Negósiu Estranjeru) nian, ba viajen estranjeiru la pasa, ho votu a-favór 23, kontra 24 no abstensaun 2. Enkuantu proposta Komisaun C, D, E no G ba viajen estranjeiru pasa.

Deputada Bankada Kongresu Nasionál Rekonstrusaun Timor (CNRT-sigla portugés), Carmelita Caetano Moniz, konsidera viajen estranjeiru iha referénsia di’ak ba diskusaun lei sira  no hetan benefísiu barak.

“Tuir loloos ami ba Argentina tanba lei kona-ba deklarasaun riku-soin ne’e ninia implementasaun di’ak tebes, maibé Komisaun A nia osan la to’o no ami ba de’it Macau tanba haree referénsia Ázia nian tomak Macau mak di’ak liu, liliu iha aproveitamentu diskusaun Lei Antí Korrupsaun no Deklarasaun Riku-soin nian”, tenik Prezidente Komisaun A ne’e, iha diskusaun orsamentu privativu PN iha plenária, ohin.

Nia afirma, viajen estranjeiru la’ós atu halakon osan povu nian.

Enkuantu, Deputadu Bankada Frente Revolusionária Timor-Leste Independente (FRETILIN), David Dias Ximenes ‘Mandati’, hateten Komisaun B nia osan ba viajen estranjeiru la pasa ne’e laiha problema.

“Ami foku de’it ba Defeza no Seguransa mós di’ak. Estranjeiru ne’e laiha mós di’ak. Loloos ne’e, viajen lokál mós la presiza. Ita bolu de’it ministru mai iha ne’e halo esplikasaun mak ne’e ona”, tenik Mandati.

Xefe Bankada Partidu Demokrátiku (PD), António da Conceição, hateten Parlamentu labele izola-aan hosi mundu, tanba presiza referénsia.

“Ita labele izola ita-nia aan. Bainhira dehan viajen estranjeiru laiha benefísiu, ne’e depende deputadu ida-idak nia intelijénsia hosi viajen ne’e”, hateten deputadu ne’e.

Hanoin seluk husi Xefe Bankada CNRT, Duarte Nunes, argumenta agora ne’e mundu teknolojia, tanba ne’e bele buka referénsia hosi internet.

“Viajen estranjeiru ne’e hasai totál mós di’ak. Ita bele buka referénsia hosi internet. Tanba ne’e, labele kompara ho membru governu sira”, nia tenik.

Deputadu Bankada Kmanek Haburas Unidade Nasionál Timoroan (KHUNTO), Luis Roberto, reforsa viajen estranjeiru la importante, maibé presiza haforsa viajen lokál.

“Di’ak liu viajen estranjeiru ne’e hasai totál, tanba dala barak deputadu balun hala’o viajen, fila hikas mai la lori buat ida mai Parlamentu ne’e”, argumentu deputadu ne’e.

Jornalista: Evaristo Soares Martins

Editór: Xisto Freitas

 

HAKEREK NO HATÁN

Please enter your comment!
Please enter your name here