Veteranu Australia ho Konsellu Fundasaun Universidade Don Boaventura, inaugura sentru formasaun Manufahi, kuarta (18/09/2019). Imajen/Nelson de Sousa

MANUFAHI, 18 setembru 2019 (TATOLI)- Konsellu Fundasaun Universidade   Don Boaventura Manufahi ho delegasaun Veteranu Australia, ohin, inaugura sentru formasaun lian Inglés iha Munisípiu Manufahi.

Veteranu Australia, Michael Stone.

Sentru Treinamentu lian Inglés nu’udar faze dahuluk hodi fasilita formasaun ba joven sira ne’ebé  akompaña ho atividade universidade  Boaventura Timor-Leste.

Sentru ne’e inaugura diretamente husi Presidente Konsellu Fundasaun Universidade Don Boaventura Manufahi, Vidal de Jesus “Reak Leman”  ho reprezentante Veteranu Australia, Michael Stone no akompaña husi Reitór Universidade  Don Boaventura, inklui delegasaun Veteranu Austrália hamutuk nain 30, veteranu Manufahi, Autoridade Manufahi, estudante ho komunidade.

Michael Stone, veteranu Australia  fiar katak,  ho sentru formasaun ne’e bele fasilita oportunidade  ba timoroan, liu-liu  Manufahi oan.

Nia hateten, iha faze dahuluk ne’e sei loke uluk formasaun lian inglés no iha planu sei loke mós iha area formasaun oin-oin hanesan, agrikultura, turizmu no sira seluk tan hodi bele prepara juventude sira ba merkadu traballu.

Obra konstrusaun Sentru formasaun ne’e hahú iha loron 10 Juñu 2019 ne’ebé hetan apoiu finansiamentu husi Veteranu Austrália ho valor $40.000,00-resin.

Sentru formasaun ne’e kompleta ho aula boot ida, hariis fatin no fasilidade sira seluk tan ne’ebé sei kompleta iha faze tuir mai.

Reprezentante Veteranu Austrália ne’e hateten, komunidade veteranu Austrália prontu ho abut ida katak, sira sei la moris mesak, sei apoiu  hodi kontribui ba dezenvolvimentu Timor-Leste nian tanba Australia ho Timor-Leste nia relasaun fundamenta kedas hahú segundu guera mundiál.

Prezidente Konsellu Fundasaun Universidade Don Boaventura, Vidal de Jesus “Reak Leman” hato’o benvindu ba maluk veteranu Australia, Nova Zelándia ho apoiu harii sentru formasaun ne’e para fasilita joven sira aprende lian Inglés.

Riak Leman mós husu ba komunidade veteranu Austrália ba oin kontinua apoiu sentru formasaun ne’ebé daudaun harii ona  bele realiza formasaun ne’ebé pertinente ba prepara joven sira nia abilidade no koñesimentu.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here