DILI, 18 setembru 2019 (TATOLI)-Vise-Ministra Kuidadu Saúde Primária, Elia dos Reis Amaral hateten taxa mortalidade aas iha mundu ba moras tuberkuloze (TB), oho ema adultu iha Timor Leste, ne’ebé afeta ba dezenvolvimentu ekonomia sustentavel. Estimasaun kazu tuberkuloze rezisténsia hamutuk 130 kada tinan iha Timor-Leste.

Ita enfrenta fatór balun ne’ebé kontribui ba akontesimentu moras tuberkuloze iha komunidade mak sósiu-ekonomia, falta sensibilizasaun, nutrisaun no má nutrisaun aas, kondisaun estrada no distánsia, falta informasaun, no edukasaun promosaun, prevensaun kada ambiente ba komunidade saudavel.

“Tanba ne’e, ha’u fiar katak ho esforsu husi profisionál saúde ne’ebé iha responsabilidade direta kona-ba programa nasionál kontrolu moras TB,  liuhusi aproximasaun multi-setoriál, tuir akuntabilidade no fahe responsabilidade sosiál, ita bele hapara Tuberkuloze,” dehan Vise-Ministra, Elia dos Reis Amaral iha nia diskursu, iha semináriu kona-ba moras TB ne’ebé sai problema boot  ba saúde públiku no mortalidade ne’ebé aas atu redús iha Timor-Leste iha Maubara Room, Timor Plaza, Dili, ohin.

Nia hateten, ita kompleta ona tinan 20 dezde referendu, konkista ita-nia independénsia maibé ita kontinua nafatin enfrenta dezafiu boot ho TB tanba ita la konsege redús insidénsia no prevalénsia moras ida ne’e dezde tinan 2010.

Task force nasionál ba hapara moras tuberkuloze iha Timor-Leste sei sai hanesan matadalan ida atu foti desizaun, define estratéjia intervensaun no mobiliza rekursu hodi aselera atividade hapara TB iha Timor-Leste. Ita presiza duni hari task force ida ne’e atu demonstra katak governu no sosiedade tomak iha duni kompromísu boot atu hapara TBC.

“Ita-nia komprimísu polítiku internasionál ho rezolusaun 71.3 iha asembleia Mundiál Saúde tinan 2019. Ministériu Saúde labele halo mesak, ita presiza halo kolaborasaun multi-setoriál no dezenvolve pakote TB kompriensivu, integra infesaun TB lahatene, detensaun kazu ativu liuhusi screening kontaktu ida kada uma kain, screening ida ne’e atu hatene vulnerabilidade TB  iha kada uma kain, estadu má nutrisaun, uza alkol no tabaku, diabetes, HIV, moras króniku seluk hepatitis, atu halo screening TB iha grupu vulnerabilidade,” dehan governante ne’e.

Nia haktuir, tinan 50 liub’a iha evidénsia nasaun barak mak redús ona taxa mortalidade TB ne’e indika katak hapara TB bele posivel iha Timor-Leste.

“Hanesan Vise-Ministra ba Kuidadu Saúde Primária ha’u sei halo buat hotu ne’ebé ha’u bele halo hodi dezenvolve kondisaun téknika materiál no infrastrutura fízika ne’ebé nesesária atu nune’e profisionál saúde bele hala’o sira nia kna’ar hodi promove detesaun, tratamentu, prevensaun no hapara kazu foun kria kondisaun atu fortalese sistema apoiu ba pasiente sira inklui edukasaun kona risku no estima kontra pasiente TB sira”.

“Ha’u hakarak apela ba reprezentante husi Ministériu relevante hanesan Edukasaun, Solidariedade Sosiál no Inkluzaun Sosiál, reprezentante husi setór Infraestrutura, Agrikultura no mós reprezentante husi konfisaun relijioza, lider komunitáriu ne’ebé marka prezensa iha forum ida ne’e atu suporta ita-nia ekipa téknika profisionál saúde sira ne’ebé prepara matadalan atu responde ba problema TB iha Timor-Leste liuhusi asaun multi-setoriál, ema hotu iha direito ba saúde tanba ne’e mai ita luta hasoru TB,” apela Vise-Ministra Kuidadu Saúde Primária ne’e.

Entretantu, partisipa iha serimónia ne’e husi mak parseiru dezenvolvimentu Ministériu Saúde (MS) hanesan OMS (Organizasaun Mundiál Saúde), profisionál saúde sira, diretór Ministériu Solidariedade Sosiál, Diretór Nasionál Ambulánsia Ospitalár no seluk tan.

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here