DILI, 18 setembru 2019 (TATOLI)—Prezidente Komisaun Organizadora ba Espozisaun Tais, Ilidio da Costa, hateten tinan ida ne’e iha komemorasaun Loron Konsulta Populár ba dala-20 liuhusi Eventu Tinan Internasionál ba Lian Indíjenas, timoroan sira hatudu no reafirma fila fali Timor-Leste nia identidade kulturál liuhusi espozisaun tais.

Espozisaun ne’ebé hala’o durante loron tolu ne’e, Ekipa Xanana Reading Room realiza liuhusi serbisu hamutuk ho Sekretariu Estadu Arte no Kultura, UNESCO, no Fundasaun Alola liuhusi ekipa programa Hakbiit Ekonomia Feto hatudu motif tais husi komunidade diferente iha Timor-Leste.

“Tinan ida ne’e ita hatudu no reafirma fila fali ita-nia identidade kulturál liuhusi espozisaun tais. Katak tais sira ne’ebé atu lakon ita tenke hamoris no prezerva hodi reafirma fali ita-nia pozisaun hanesan timoroan liuhusi hamoris atividade kulturál hanesan soru tais ho espozisaun tais para joven sira bele hatene,” dehan Prezidente Komisaun Organizadora ba Espozisaun Tais, Ilidio da Costa, ba jornalista sira hafoin loke Espozisaun Tais iha Xanana Reading Room, Lecidere, Dili, kuarta (18/09/2019).

Espozisaun tais, nia hatutan, ita ko’alia kona-ba Timor-Leste nia identidade tanba Timor-Leste nia identidade la’ós roupa obralan maibé tais. Tanba ne’e, nia dehan, liuhusi espozisaun ne’e hodi hatudu ba joven sira no bainaka sira husi rai katak Timor-Leste nia identidade kulturál ida mak tais.

Tanba ne’e, nu’udar prezidente komisaun organizadora, nia sujere ba Governu Timor-Leste atu bele loke “Tais Market” iha kada munisípiu iha Timor-Leste tomak no la’ós loke de’it “Tais Market” ne’ebé konsentra iha Sidade Dili de’it.

“Agora ita ba munisípiu sira, ita haree fatin ba faan obralan ne’e iha maibé fatin ba fa’an tais ne’e laiha. Nusa mak Governu la aloka osan oituan atu halo fila fali ‘Tais Market” ne’e iha munisípiu. Ida ne’e hanesan rekomendasaun husi komisaun organizadora ba Governu para halo esforsu ida hodi bele loke ‘Market Tais’ iha kada munisípiu. Atu nune’e, bainaka sira ba vizita karik bele ba vizita fatin ne’e,” nia dehan.

Espozisaun Tais ne’ebé hala’o iha Xanana reading Room ne’e bele realiza tanba iha kooperasaun serbisu entre Sekretariu Estadu Arte no Kultura, Fundasaun Alola, no UNESCO. Espozisaun refere partisipa husi grupu soru tais husi Munisípiu Baucau, Ainaro, Bobonaro, Lospalos no Oe-Cusse hodi hatudu tais orijinál husi kada munisípiu ida-idak ba publiku no ba bainaka sira husi rai li’ur.

Jornalista: Cancio Ximenes

Editór.       : Rafy Belo

HAKEREK NO HATÁN

Please enter your comment!
Please enter your name here