Diretór Ezekutivu TIC, Roberto Caetano de Sousa Vicente. Imajen/Antonio Goncalves.

DILI, 18 setembru 2019 (TATOLI) – Diretór Ezekutivu Teknolojia Informasaun no Komunikasaun (TIC, sigla portugés), Roberto Caetano de Sousa Vicente, informa Ajénsia TIC husu orsamentu adisionál iha reuniaun Komité Revizaun Orsamentu Polítika (KROP) ho montante millaun $4-resin.

“Ami haree iha nesesidade duni, tanba ne’e ami husu orsamentu adisionál ho montante (millaun) $4.371,756.20 hodi finansia programa ne’ebé iha, atu hadi’ak liután prestasaun servisu públiku”, Roberto Sousa ba jornalista sira iha Ministériu Finansa, Aitarak-Laran, ohin.

Ba tinan oin, orsamentu hirak ne’e atu kontinua finansia programa prioridade hanesan konetividade liña ministeriál inklui munisípiu hotu, ezemplu, emisaun ba kartaun eleitorál, pasaporte no seluk tan ne’ebé liuhosi diresaun notariadu.

“Se ida ne’e maka ita la tenta ho nia konetividade fibra ótika, sira sei hasoru difikuldade atu halo sira-nia serbisu di’ak liután, sira bele halo konesaun maibé liuhosi konetividade internét ne’ebé sei prejudika kustu barak liu”, katak.

Tanba ne’e, Roberto Sousa akresenta TIC kontinua husu orsamentu ho intensaun atu hadi’ak liután prestasaun serbisu públiku, tanba uluk ema dehan ita labele maibé realidade timoroan matenek barak iha programasaun, infraestrutura no seluk tan.

Proposta orsamentu millaun $4-resin, sei iha diskusaun filafali iha nivel tékniku, tanba ne’e, Roberto Sousa dehan sei iha mudansa ka bele tun uitoan.

Jornalista : Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here