Foto/Google.

DILI, 18 setembru 2019 (TATOLI) – Xefe Departamentu Karta Kondusaun Diresaun Nasionál Transporte no Terrestre (DNTT) Ministériu Transporte no Komunikasaun (MTK), Florentina Bento Alves Pereira, husu ba motorista sira atu tau atensaun ba vida pasajeiru bainhira lori viatura iha dalan públiku.

Tanba daudaun ne’e, asidente akontese iha fatin-fatin hodi rezulta vítima barak ona no ida ne’e sai hanesan preokupasaun ida.

“Ita rona ikus-ikus ne’e dezastre veíkulu iha fatin-fatin no ema barak preokupa, tanba ne’e husu ba iha ita-nia maluk kondutór sira atubele tau atensaun ba pasajeiru sira-nia vida, nune’e redús asidente”, Florentina dehan ba Tatoli via telefone, ohin.

Tanba públiku nia persepsaun ne’e mai fali DNTT liuliu kestiona kapasidade servisu ba kestaun fó karta kondusaun.

“Kondutór sira tenke konsiente katak sira lori ema nia vida, la’ós lori ema lori buat seluk, tanba ne’e presiza konxiénsia atu viajen labele hetan problema”, Florentina dehan.

Nia salienta, realidade motorista balun maka laiha konxiénsia hodi halo tun-sa’e, nune’e la kumpre regra tránzitu ne’ebé maka iha. Tanba ne’e husu ba hotu-hotu lori karreta no motór kumpre regra tránzitu sira ne’ebé maka iha atubele prevene asidente tráfegu.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here