Prezidente Interinu Autoridade Rejiaun Administrativa Espesial Merkadu Oe-Cusse Ambeno (RAEOA) no Zona Espesial Ekonomia Sosial Merkado (ZEESM) Arsenio Paixão Bano. Imajen/Egas Cristovão.

DILI, 18 setembru 2019 (TATOLI) – Rejiaun Administrativa Espesiál Oekusi-Ambenu (RAEOA) ho Zona Espesiál Ekonomia Sosiál Merkadu (ZEESM) husu orsamentu adisionál iha reuniaun Komité Revizaun Orsamentu Polítika (KROP) hamutuk millaun $127.

“Proposta Oekusi nian hamutuk millaun $127, plafon ne’ebé Governu sentrál fó iha tinan 2020 hamutuk millaun $26. Ami tenta, tanba sá maka husu osan adisionál ba Komité Revizaun Orsamentu Polítika ne’ebé prezide hosi Primeiru-Ministru rasik no sira maka sei tetu. Ami aprezenta razaun katak ami lakohi Oekusi eletrisidade mate, ami hakarak ai-moruk la falta, ami hakarak serbisu ne’ebé hahú ona tenke kontinua, hanesan estrada tenke to’o Oesilu, Pásabe, Naktuka no Indonézia halo daudauk ona”, Prezidente Autoridade interinu RAEOA, Arsénio Bano, afirma hafoin partisipa iha reuniaun KROP, iha Ministériu Finansa, Aitarak-Laran, ohin.

Hafoin aprezenta proposta, delegasaun hosi RAEOA-ZEEMS mós simu preokupasaun hosi KROP liuliu Primeiru-Ministru, Taur Matan Ruak, katak Oekusi presiza hatama fali osan.

“Ami hetan pergunta hosi KROP katak Oekusi nia investimentu tenke hatama fali osan, ne’e loos duni, tanba ne’e maka reseita komesa kobre daudauk ona. Maibé, ami mós husu ona Primeiru-Ministru katak ami-nia osan iha tinan 2019 nian presiza transfere ho lalais, tanba ami simu osan tarde, nune’e ami ezekuta mós tarde”, Arsénio Bano esklarese.

Nia hatutan REAOA-ZEEMS sempre simu osan tarde no kuandu tarde maka ekonomia baze mós la la’o, modo, na’an populasaun nian la folin no ojek, kioske mós la hetan osan.

“Razaun ami husu adisionál tanba ami lakohi servisu para, iha bens no servisu ami presiza tan osan atu halo operasaun nafatin ba sentrál elétrika besik osan hamutuk millaun $5 kada tinan, aeroportu internasionál Rota do Sândalo presiza osan kuaze millaun $6, no Oekusi presiza moos nafatin”, esplika.

Arsénio Bano dehan, Orsamentu Jerál Estadu 2019 RAEOA-ZEEMS nian foin maka transfere iha fulan juñu, no daudaun ne’e ezekusaun atinje porsentu 60.

Notísia relevante : RAEOA-ZEESM Kobre Ona Reseita Millaun $32

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here