Rádiu Café Ermera simu apoiu husi SEKOMS. Foto TATOLI: Nelia Fernandes

ERMERA, 18 setembru 2019 (TATOLI)-Rádiu Komunidade Café Ermera Gleno ho Frekuénsia Moduladu (FM), 92,3 Mhz, simu motor ida, komputadór ida no audio-gravadór rua husi Sekretáriu Estadu Komunikasaun Sosiál (SEKOMS) liuhusi Diresaun Nasionál Sentru Rádiu Komunidade (CRC-sigla portugés), ohin.

“Ha’u hatene imi-nia atividade sempre la’o, loroloron la’o hela, entaun, ha’u hanoin ha’u la presiza aviza antes, bainhira de’it ha’u hakarak vizita haree kondisaun, prosesu la’o oinsá, ha’u sei vizita,” hateten Sekretáriu Estadu, Merício Juvinal dos Reis “Akara” iha vizita kortezia hodi entrega ekipamentu no motorizada ba Rádiu Komunidade Café Ermera.

Merício Akara dehan, sei la para de’it iha ne’e, iha estasaun rádiu komunidade sira seluk mós sei halo hanesan.

Governante ne’e mós hateten katak polítika governu maka kontinua apoiu nafatin, fó subsidiu ba rádiu komunidade hotu para kontinua fungsiona. “Kontinua sai fontes informasaun ba ita-nia komunidade, bele divulga atividade governativa para ita-nia sidadaun bele akompañaa nafatin”.

Nia mós husu jerente rádiu no ekipa tomak atu kontinua atualiza aan, moderniza aan tanba agora mundu dijitál.

Iha fatin hanesan, Diretór Nasionál Sentru Rádiu Komunidade (CRC-sigla portugés), Abel da Conceição informa katak motor ne’e SEKOMS entrega, hola parte iha orsamentu Transferénsia Públika. Enkuantu, komputadór no audio-gravasaun husi UNICEF (United Nation International Children Fund), ho esperansa katak liuhusi apoiu ne’e bele foti informasaun atuál sira ne’ebé iha baze, lori bele mai fó sai iha rádiu komunidade, atu nune’e komunidade sira iha Ermera, bele asesu ba saida mak akontese iha rurál.

Enkuantu, iha fatin hanesan Jestór Rádiu Komunidade Café Ermera, Bento dos Santos Martins orgullu tebes ho fasilidade ne’ebé mak SEKOMS entrega ba sira.

Nia reforsa, ho apoiu ne’e la’ós másimu maibé natoon ba rádiu komunidade atu bele hakle’an, fasilita jornalista sira ne’ebé atu hala’o sira-nia serbisu ba iha komunidade.

“Tanba ita-haree Munisípiu Ermera iha postu ne’ebé dook tebes, liuliu ba iha Atsabe, Hatulia maibé dala ruma jornalista labele halo ninia atividade to’o iha ne’ebá maibé fiar katak ho ajuda ne’e bele lori sira ba to’o iha fatin ne’ebé sira bele ba,” nia konsidera.

Notísia relevante:SEKOMS Entrega Motor 16 Ba Sentru Rádiu Komunitáriu Sira

Jornalista: Nelia Fernandes

Editór: Rafy Belo

HAKEREK NO HATÁN

Please enter your comment!
Please enter your name here