Jenerál Peter John Cosgrove ne'ebé lidera misaun INTERFET iha Timor tinan 1999. Imajen Espesiál

DILI, 18 setembru 2019 (TATOLI) – Jenerál Peter John Cosgrove ne’ebé lidera misaun INTERFET iha Timor tinan 1999, sei sai bainaka espesiál iha Komemorasaun Tinan 20 prezensa INTERFET iha Timor-Leste, 20 setembru ne’e.

Koordenadór programa ba Komemorasaun Tinan 20 Konsulta Populár no prezensa misaun INTERFET atuál Diretór Ezekutivu Centro Nacional CHEGA!, Hugo Maria Fernandes hateten iha Komemorasaun ne’e sei laiha tan bainaka importante seluk, maibé iha de’it bainaka espesiál mak Peter John Cosgrove.

Tuir planu, Peter Cosgrove sei to’o Timor iha loron 19 fulan ne’e, no iha semana ne’e vetaranu Australianu sira ne’ebé uluk hola parte mós iha misaun INTERFET hamutuk atus ida lima-nulu (150) sei to’o uluk iha Timor atu partisipa komemorasaun loron importante ne’e.

Koordenadór programa Hugo informa katak serimónia hotu sei hahú kedas iha loron 19, ne’ebé sei hahú ho atividade sira mak hanesan veteranu hosi Austrália sei hala’o vizita ba Centro Nacional CHEGA!, vizita mós Arquivo Museu da Resistência Timorense (AMRT) no mós vizita Semitériu Santa Cruz.

Iha parte loraik tuku 16:00, sei iha lansamentu filme ne’ebé Komisaun Organizadora prodúz propriamente ba Selebrasaun Tinan 20 Konsulta Populár no prezensa misaun INTERFET, fatin iha AMRT.

Komemorasaun kulminante misaun INTERFET sei hala’o iha loron 20 setembru, monu loos iha loron ne’ebé INTERFET to’o iha Timor.

Atividade ofisiál sei hala’o iha Paláçio do Governo ne’ebé sei prezide hosi Prezidente Repúblika, Francisco Guterres Lú Olo, ho nia intervensaun.

Hafoin serimónia, sei halo marsa ida hosi Paláçio do Governo to’o Centro Convencões Dili (CCD), iha ne’ebá sei iha mós aprezentasaun kona-ba atividade kulturál balun, inklui ezibisaun.

Iha parte loraik, sei iha mós atividade desportu (jogu futeból), entre veteranu Austrália ho veteranu Timor-Leste, ne’ebé sei involve mós hosi Jenerál Peter John Cosgrove no eis Prezidente Repúblika, Kay Rala Xanana Gusmão.

Jornalista: Cipriano Colo
Editór: Xisto Freitas

HAKEREK NO HATÁN

Please enter your comment!
Please enter your name here