Diretór Jerál Serbisu Migrasaun, Superintendente Polisia Agostinho Gomes Imajen/MI

DILI, 18 setembru 2019 (TATOLI)-Gabinete Inspesaun Auditoria Diresaun Nasionál Serbisu Migrasaun (DNSM) hatún ona ekipa investigasaun  ba oknum funsionáriu Serbisu Migrasaun Postu Fronteira Bobometo- Oe-Cusse  ne’ebé deskonfia halakon osan Estadu ho montante rihun $4,230.00.

Notísia Relevante : MI Submete Ona Kazu Migrasaun Ba KAK

 Bazeia ba informasaun ne’ebé Migrasaun simu, deskonfia oknum Serbisu Migrasaun la hatama relatóriu orsamentu taxa nian ba banku husi fulan jullu too agostu 2019.

Diretór Jerál Servisu Migrasaun, Superintendente Polisia Agostinho Gomes, rekoñese mosu duni irregularidade iha nia diresaun, tanba ne’e sira nia parte loke ona investiga no sei fó sansaun ba membru ne’ebé envolve direta iha aktu ne’e.

Notísia Relevante : FM Husu Prosesa Kazu Oknum Serbisu Migrasaun

“Informasaun ne’e loos, agora Gabinete Inspesaun Auditoria Servisu Migrasaun halo hela prosesu investigasaun, konserteza katak, see karik, ne’e loos nia (okonum polisia) tenke responsabiliza ba aktu ne’ebé nia halo,”  afirma Diretór Migrasaun Agostinho Gomes, ba jornalista, ohin, iha edifísiu Serbisu Migrasaun, Ministériu Interiór, Vila Verde, Dili.

Serbisu Migrasaun rasik bolu ona, oknum polisia migrasaun ne’e provizóriu mai Dili hodi hein prosesu investigasaun.

Dezde asume kargu hanesan Diretór Jerál Serbisu Migrasaun nian, Agostino Gomes, sei obedese no asegura desizaun hotu Ministru tutela nian, liu-liu la tolera aktu krime korrupsaun.

 Jornalista : Eugénio Pereira  

Editór        : Francisco Simões

HAKEREK NO HATÁN

Please enter your comment!
Please enter your name here