Sekretáriu Estadu ba Protesaun Sivíl, Alexandrino de Araújo. Imajen/António Gonçalves

DILI, 18 setembru 2019 (TATOLI)- Ministériu Interiór (MI) liuhusi Sekretáriu Estadu Protesaun Sivíl (SEPS), ohin, fasilita semináriu nasionál ida ba funsionáriu kona-ba Dekretu Lei Rejime Kontributivu Seguransa Sosiál no Étika Dixiplina.

Sekretáriu Estadu Protesaun Sivíl, Alexandrino Xavier de Araújo iha serimónia abertura friza katak, dekretu lei Rejime Kontributivu Seguransa Sosiál no Étika Dixiplina importante tebetebes ba funsionáriu públiku sira hodi hatene kona-ba sira nia direitu.

“Saida mak rejime Kontributivu seguransa sosiál e étika no dixiplina bele fó hanoin hodi halo avaliasaun ba ida-idak nia aan no mós mai ami governante sira hodi kontribui ba dekretu lei ne’ebé estabelese ona,” afirma  Sekretariu Estadu Alexandrino Araújo.

Nia dehan, liu husi semináriu ne’e bele hatene kona-ba instrumentu ba ida-idak nia aan hodi haree ba importánsia no benefísiu ba kontribuisaun husi rejime ne’e ba dezenvolvimentu serbisu iha administrasaun públika ninian ho domin no responsabilidade.

Nia  husu ba funsionáriu hotu-hotu tenke korrije aan, serbisu ho fuan no laran tanba bainhira sai nu’udar funsionáriu públiku sempre halo uluk kompromisu lubuk ida, tan ne’e rejime Kontributivu seguransa sosiál no étika e dixiplina banati tuir kananuk Marsha Funsaun Públika ninian.

“Presiza iha komunikasaun di’ak iha administrasaun públika entre imi ho públiku, imi ho superiores no ema hotu ho nune’e bele kontribui ba dezenvolvimentu serbisu funsaun públika ninian ho di’ak liut án,” nia hateten.

Antes ne’e Ministériu Solidariedade Sosiál no Inkluzaun (MSSI) hala’o ona sosializasaun kona-ba Rejime Kontributivu Seguransa Sosiál ba Funsionáriu hotu  husi liña ministériu.

Seguransa sosiál nu’udár direitu umanu fundamentál tuir Deklarasaun Universál dos Direitus Humanus iha artigu 24. Liu husi deklarasaun ne’e, Estadu Timor-Leste konsagra kedas direitu ida ne’e iha Konstituisaun Repúblika Demokrátika de Timor-Leste (RDTL) artigu 56 ne’ebé iha pontu ida hateten katak sidadaun hotu-hotu iha direitu ba seguransa no asisténsia sosiál tuir lei no kna’ar Estadu nian.

Rejime Kontributivu Seguransa Sosiál hateten katak, Estadu iha obrigasaun atu bele promove no organiza seguransa sosiál tuir lei hodi haktuir ba direitu konstitusionál ida ne’ebé Estadu organiza.

Sistema protesaun sosiál ne’e rasik fahe ba parte sira hanesan seguransa sosiál no pilár seguransa sosiál rasik fahe ba parte rua mak hanesan seguransa sosiál Kontributivu no seguransa sosiál da sidadania non Kontributivu.

Iha Lei No. 12 /2016, 14 de Novembru kona-ba Rejime Kontributivu Seguransa Sosiál foin mak atu implementa tanba nia regulamentu sira foin maka promulga iha 19 Maiu 2017.

Dezde tinan 2008 governu dezenvolve no implementa ona asaun protesaun sosiál, programa no medida protesaun sosiál lubuk liu husi pilár asisténsia sosiál.

Rejime ne’e funsiona ho kontribuisaun traballadór no entidade empregadór sira tantu husi setór privadu no setór públiku, ho nune’e hodi kontribui osan ba karteira komún ida no karteira komún ida ne’e sei la jere hamutuk ho Orsamentu Jerál Estadu nian. Bazeia ba Dekretu Lei No. 12 /2016, 14 de Novembru, traballadór sei kontribui 4%, no entidade empregadór sei kontribui 6%.

Jornalista: Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here