DILI, 18 setembru 2019 (TATOLI)-Ministériu Finansa liu husi tetu fiskál 2020 fó ba Munisípiu Aileu purvolta Millaun $2.3 no ba Munisípiu Manufahi ho total millaun $2-resin hodi ezekuta ba saláriu vensimentu, bens servisu no transferénsia públika.
“Ami iha orsamentu purvolta Millaun $2-itál fahe ba kategoria tolu ne’ebé mak ami aprezenta ba komité revizaun orsamentu,” hatete Prezidente Autoridade Munisípiu Manufahi, Arante Isaac Sarmento, ba Ajénsia TATOLI, hafoin aprezentasaun proposta OJE 2020 ba Komisaun Revizaun Orsamentu Polítika (KROP) iha Ministériu Finansa, Dili, tersa (17/09/2019).
Arante Isaac Sarmento, esplika, iha planu OJE tinan oin sei kontinua reforsa ba programa sira ne’ebé la’o ona hanesan programa ba grupu hamoos ezgotu, saneamentu, haforsa monitorizasaun no fiskalizasaun ba serbisu projetu infraestrutura bázika no serbisu administrasaun sira.
Iha biban hanesan, Administradór Munisípiu Aileu, João Tilman do Rego, informa, importante husi OJE kada tinan maka tenke fó impaktu direta ba povu ninia moris liuhosi projetu sira.
Munisípiu Aileu iha millaun $2.3 ba OJE 2020 hodi ezekuta ba saláriu vensimentu, bens serbisu no transferénsia públika.
Jornalista : Osória Marques
Editór : Francisco Simões
