DILI, 18 setembru 2019 (TATOLI)-Ajénsia Kooperasaun Internasionál Korea (KOICA), ohin, halo lansamentu zero plástiku hodi apoiu planu governu atu redús lixu sira iha Timor-Leste (TL).  Projetu zero plástiku ne’e, KOICA nu’udar doadór no implementadór mak Mercy Corps ho CALTEC.

Investimentu ne’e KOICA implementa ho vizaun ida katak projetu sira investe iha kompañia seluk bele investe fali ba sira.

“Bazeia ba polítika ne’e, KOICA mós hakarak kontribui uitoan kona-ba oinsá atu resikla, redús, re-uza seriál plástiku sira iha Timor-Leste,” hateten Diretór Sikhyon KIM ba Ajénsia TATOLI iha nia kna’ar Timor Plaza, tersa ne’e.

Nia informa, projetu ne’e nu’udar projetu prinsipál sira nian iha tinan ida ne’e to’o tinan 2021. “Purvolta 3 millaun dolár ne’ebé maka sei investe. Nune’e projetu ne’e la’ós de’it tau presu ba iha items resiklajen maibé ba mós dezastre naturál nune’e atu neutral dezastre naturál ne’ebé maka sei mosu iha futuru”.

Diretór Sikhyon KIM konsidera katak maioria ema hanoin plástiku ne’e lixu de’it tanba ne’e sira sempre sunu maibé kuandu sunu entaun nia efeitu, nia su’ar bele la di’ak ba saúde.

“Tanba ne’e ha’u sente iha ami-nia vizaun balun, barak liu plástiku ne’e bele uza ba resiklajen depois prosesu ami uza plástiku ba halo aspál no prodús materiál balu; aspál bele troka uza plástiku,” nia dehan.

Entretantu, projetu Zero Plástiku ne’e investe hamutuk orsamentu ho montante millaun tolu. HEINEKEN no CALTEC investe hamutuk 1.5 millaun no KOICA 1.5 millaun.

Jornalista: Nelia Borges

Editór      : Rafy Belo 

HAKEREK NO HATÁN

Please enter your comment!
Please enter your name here