Logotipu JICA

DILI, 18 Setembru 2019 (TATOLI)-Programa JICA (Ajénsia Kooperasaun Internasionál Japaun-sigla inglés) iha tinan 2019 ne’e mak foka ba área prioridade tolu hanesan dezenvolve no hadi’a infraestrutura ekonómika, promosaun no diversifikasaun indústria liuhusi atividade setór agrikultura, indústria ho turizmu no mós hadi’a no habelar prestasaun servisu sosiál atu bele promove atividade ekonomia iha Timor-Leste.

“JICA fó asisténsia dezenvolvimentu ne’ebé maka kualidade ba manutensaun no jestaun infraestrutura liuhusi estabelese Ponte Komoro 3, Ferry Terminal, hodi bele ajuda Timor-Leste, diversifika indústria ekonómiku atuál ne’ebé depende liu ba reseita mina no gás,” informa Ofisiál Program JICA, Armando Amaral da Cruz ba Jornalista Ajénsia TATOLI iha edifísiu JICA, Bebonuk, horiseik.

Armando informa tan katak JICA mós ajuda Timor-Leste  hodi dezenvolve indústria inklui agrikultura no peska hodi hasa’e rekursu umanu industriál liuhusi  “Domestic Rice Project”, haruka peritu Japonés ida mai servisu hamutuk ho governu Timór iha área dezenvolvimentu no área indústria

Projetu “Strengthening Domestic Rice Production” iha Timor-Leste halo parte iha JICA nia área prioridade daruak. “Projetu refere hahú iha tinan 2016 no sei remata iha tinan 2021. Programa ne’e hanesan programa parseiru entre JICA ho MAP (Ministériu Agrikultura no Peska) hamutuk ho CLN (MTCI)”.

“Objetivu husi projetu refere atu hasa’e produtividade produsaun haree iha Timor-Leste, fó importánsia ba jestaun no manutensaun ba fasilidade irigasaun, hasa’e sistema merkadoria hodi sosa no fa’an produtu lokál (foos rai) nune’e mós hasa’e sistema armazenamentu no distribuisaun foos rai,” nia esplika.

Ofisiál Programa JICA, Armando Amaral da Cruz haktuir katak projetu refere implementa daudaun iha área irrigasaun Maliana (Bobonaro) no iha Balutu baliza entre munisípiu Manatutu (Laleia) no Munisípiu Baucau (Vemase).  Projetu ne’ebé implementa iha munisípiu sira ne’e iha tebes progresu.

“Progresu agora daudaun la’o di’ak tebes liu-liu iha produsaun no produtividade haree iha área rua ne’e; agrikultór sira konsege halai natar dala rua iha tinan ida nia laran tanba bee ne’ebé mak sufisiente no agrikultór sira iha ona planu oinsá atu bele utiliza kalendáriu kultivasaun ne’ebé mak introdús husi ekipa projetu liuhusi peritu Japonés ida,” nia konsidera.

Nia konsidera tan katak husi parte merkadoria mós la’o di’ak tanba konsege loke ona Loja dos Agricultores ida iha Timor-Plaza hodi bele akumula produtu foos rai no mós produtu lokál sira seluk.

“Iha parte ne’e JICA serbisu hamutuk ho CLN no mós ACELDA hodi bele halo kompra ba agrikultór sira-nia hare ne’ebé mak sira prodús,” informa Ofisiál Programa ne’e.

Tanba ne’e nia hateten, JICA iha Timor-Leste nia papél importante atu ajuda hasa’e produsaun no produtividade hare hodi agrikultór sira bele fa’an sira-nia hare no bele hetan osan hodi hadi’a ekonomia uma laran.

JICA Fó Formasaun Dezeñu no Analiza Sistema Fornesimentu Bee MoosNotísia relevante:

Jornalista: Nelia Borges

Editór      : Rafy Belo

HAKEREK NO HATÁN

Please enter your comment!
Please enter your name here