Primeiru Ministru Taur Matan Ruak akompaina husi Ministra Finansa ein-Ezersísiu, Sara Lobo Brites kontinua dirije enkontru revizaun ba pakote OJE 2020, iha salaun Ministériu Finansas, Aitarak-Laran, Dili, 17 Setembru 2019. Imajen/Antonio Goncalves

DILI, 18 setembru 2019 (TATOLI) – Xefe Gabinete Primeiru-Ministru (GPM), Afonso Corte Real, informa gabinete ne’e presiza tan adisionál $800.000 resin hosi Orsamentu Jerál Estadu (OJE) 2020, hodi bele apoiu tékniku iha instituisaun sira ne’ebé tutela iha Gabinete refere.

“Gabinete Primeiru-Ministru la’ós de’it toma konta iha Gabinete ida, maibé mós ba instituisaun seluk hamutuk 12, maibé ida ne’ebé iha Primeiru-Ministru nia okos mak Sosiedade Sivíl no Auditoria Sosiál, nune’e osan ne’e ami husu adisionál uituan para bele ajuda instituisaun hirak ne’e”, tenik Afonso Corte Real iha salaun Ministériu Finansa (MF), kuarta ne’e.

Nia esplika, osan adisionál ne’e atu ajuda mós iha kapitál menór, nune’e bele sosa materiál servisu nian.

“Osan totál ami-nian ne’ebé sira fó mai ami hamutuk millaun $9 resin, maibé ami hasai tiha balun ba Tecnologia da Informação e Comunicação (TIC) no Centro Nacional Chega, nune’e ami fiar katak tinan tuir mai  instituisaun rua ne’e bele simu ona sira-nia osan hodi bele jere rasik,” nia esplika.

Entretantu, iha OJE 2019, orsamentu ba GPM ho totál millaun $9,670, ne’ebé fahe ba Gabinete apoiu Primeiru-Ministru hamutuk millaun $2,212, Gabinete Apoiu Sosiedade Sivíl millaun $4,641, apoiu Rezisténsia Ofisiál Primeiru-Ministru $25.000, no TIC ho orsamentu millaun $2,793.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here