Grupu Movimentu Kamponezes Timor-Leste hamutuk ekipa Sekretáriu Estadu Kooperativa distribui hela Pateka, rezultadu kolleita husi Munisípiu Kovalima ba Madre sira iha Bidau Mota Klaran. Foto/Mídia SEKoop.

DILI, 17 setembru 2019 (TATOLI) – Asesór Tékniku Sekretáriu Estadu Kooperativa (SEKoop) Estanislau Claudio Ximenes, hateten bá oin Governu sei tulun Movimentu Kamponezes Timor-Leste (MOKATIL) atu harii loja ida iha Dili, nune’e bele fo oportunidade ba komunidade sira ne’ebe iha produsaun bele lori produtu lokál bá fa’an.

“Bá oin Governu presiza harii loja kamponeza ida sentraliza iha Dili, nune’e MOKATIL bele halo kontratu ho empreza sira atu sira bele lori produtu lokál sira ne’e ba fa’an iha sira-nia loja”, dehan nia ba TATOLI iha Bairru Pité, ohin.

Nia dehan daudaun ne’e, husi MOKATIL rasik hamutuk ho toos-na’in sira komesa halo ona produsaun ba produtu lokál barak hanesan ba iha Pateka ne’ebe konsege lori ona mai iha Dili hodi fa’an iha loja sira.

“Tanba ne’e, atu insentiva ba iha ita nian grupu MOKATIL no ba maluk agrikultór sira lori sira nian produtu mai asesu iha loja sira, entaun presiza kria loja kamponeza nune’e bele tulun ita nian agrikultór sira “, dehan Asesor Tékniku ne’e.

Iha fatin hanesan, Vise-Prezidente MOKATIL, Julião da Costa, hatete grupu MOKATIL hamutuk ho toos-na’in sira hahú prodús ona Pateka iha munisípiu Kovalima ho ektare tolu no iha postu Salele ektare ida maka kolleita ona no daudaun lori ona balun mai Dili.

“Ami konsege halo ona negosiasaun ho empreza sira no empreza sira komesa fa’an ona produtu lokál sira ne’e iha sira-nia loja”, dehan nia.

Atu garante duni produtu lokál nian sustentabilidade, MOKATIL sujere Governu harii loja kamponeza, nune’e produtu komunidade sira nian MOKTIL bele lori mai asesu iha Dili hodi bele haforsa ekonomia maluk sira atu sustenta sira-nia moris.

Julião salienta daudaun iha ona loja balun ne’ebe maka hahú hola ona produtu Pateka ne’ebe grupu MOKATIL hamutuk ho komunidade toos-na’in sira prodús ho kuantidade balun hola fuan 50 to’o 60, maski la boot maibé ne’e iha ona progressu.

Produsaun Pateka husi grupu MOKATIL ho kuantidade boot liu maka iha Kovalima no tuirmai Vikeke no munisipiu seluk tan.

Husi rezultadu produsaun Pateka ne’ebé kolleita ona husi Kovalima no lori mai Dili ne’e, ohin, MOKATIL hamutuk ho ekipa SEKoop fahe ba iha maluk pasiente sira iha Ospitál Bairru Pité hamutuk 200, orfonatu Bidau Mota Klaran 100, Ismaek Tibar 150 no maluk difisiénsia sira Fundasaun Aisaun Fatuhada 50.

Jornalista : Natalino Costa
Editora : Maria Auxiliadora

1 KOMENTÁRIU

  1. Governo perpara loja tradisional, depois sosa produtu lokais husi povu lori mai Governo mak faan. Laos povu mak atu faan direita.
    Guvernu uja fali sistema povu kuda Guvernu sosa, uja siatema ida nee hodi sosa produtu lokais depois guvernu faan tutan ba funsionariy sira iha municipal. E loja nee labele harii deit iha kapital. Loja nee persisa harii iha municipal sira hotu. Obrigado

HAKEREK NO HATÁN

Please enter your comment!
Please enter your name here