Primeiru-Ministru, Taur Matan Ruak, Prezidenti Parlamentu Nasionál, Arão Noé, iha lansamentu Portu Tibar. Imajen/MF

DILI, 18 setembru 2019 (TATOLI) – Governu preukupa ho medida ne’ebé Tribunál Distritál Dili (TDD) foti, relasiona ho disputa rai iha área Kaitehu, entre kompañia Marino Enterprise no China Harbour, tanba ne’e husu atu Tribunál revee fali medida ne’ebé foti.

Iha loron 3 setembru 2019, TDD emite karta ne’ebé fó tempu ba Diretór kompañia China Harbour Timor, Lda, Wang wei, durante loron 10 nia-laran atu entrega petisaun ka dokumentu inisiál hodi kontra faktu sira ne’ebé Diretór kompañia Marino Enterprise, Edencio Soares, alega.

Tuir dokumentu ne’e, Edencio Soares nu’udar rekerente ka autór ba kazu ne’e, liuhosi ninia advogadu, Pedro Aparício, rekere ba Tribunál ho providénsia kautelár, espesifikadu ba restituisaun posse, kontra kompañia China Harbour, empresa ho kapitál $10,000.00, ho númeru rejistu TIN 1190065.

“Haree ba faktu hirak ne’e, Governu desidi foti asaun reprezenta Estadu no defende interese públiku, hodi alerta ba Tribunál tan erru ne’ebé komete ona, nune’e Tribunál bele revee fila-fali medida no dekreta, hodi anula no ordena atu sobu saida de’it maka taka dalan ka meiu atu la bele hetan asesu ba pedreira”, refere nota imprensa husi portál ofisiál Governu, kuarta ne’e.

Notísia Relevante: China Harbour Simu Ona Karta Atu Kontesta Marino Enterprise

Hatutan: “Hafoin halo tiha análize ba prosesu, haree hetan katak Tribunál dekreta medida kautelár ba parsela rai ne’ebé sala. Atu dehan katak, Tribunál husu atu halo restituisaun provizória ba posse kona-ba parsela rai ida no Tribunál haruka ezekuta medida ba parsela rai ida seluk fali. Ida ne’e hamosu konfuzaun no halo ema hotu hakfodak, inklui mós Governu”.

Tuir prosesu Tribunál, rekerimentu ko’alia kona-ba parsela rai ida ne’ebé lokaliza dook ho distánsia liu kilometru 1, hosi parsela rai ne’ebé nu’udar objetu ezekusaun Tribunál nian.

“Erru ida ne’e taka dalan assesu ba servisu pedreira no ida ne’e impede kontinuasaun servisu pedreira, ho risku sériu ba konstrusaun Portu Tibar tanba sei la hetan fornesimentu materiál atu halo konstrusaun nesesáriu”, haktuir nota ne’e.

Liuhosi nota ne’ebé divulga, Governu hato’o preukupa ho kazu ne’e tanba hanoin ba impaktu saida mak bele mosu ba konstrusaun Portu Tibar, tanba suspensaun servisu esplorasaun ba pedreira hosi China Harbour, ne’ebé hanesan sub-kontratór husi kompañia franseza, Bolloré ba konstrusaun Portu Tibar.

Notísia Relevante: PM Lansa Ona Konstrusaun Projetu PPP Portu Tibar

Membru Governu sira ne’ebé nu’udar responsável ba Projetu Portu Tibar maka Ministru Planeamentu no Investimentu Estratéjiku ein ezersísiu, Hermenegildo Augusto Cabral Pereira, Ministra Finansas ein  ezersísiu, Sara Lobo Brites, Ministru Obra Públika, Salvadór Eugénio Soares dos Reis Pires no Ministru Transportes no Komunikasaun, José Agostinho da Silva, tanba ne’e membru Governu reuni tiha informasaun kona-ba medida kautelár ne’ebé Tribunál dekreta ona kona-ba oinsá parsela rai ne’ebé hola parte ba pedreira.

“Projetu ida-ne’e n’uudar interese públiku, ne’ebé hakerek iha Planu Nasionál Dezenvolvimentu Estratéjiku Timor-Leste nian ba 2011-2030, ne’ebé maka Governu Konstitusionál hotu-hotu iha pasadu no agora sempre apoia no promove”, subliña nota ne’e.

Konstrusaun Portu Tibar Hahú Iha 2018

Iha loron 30 agostu 2018, Primeiru-Ministru (PM), Taur Matan Ruak halo lansamentu ba konstrusaun Portu Tibar, ne’ebé tuir planu loron konstrusaun hahú husi loron lansamentu no sei remata iha 30 agostu 2021.

Konstrusaun Portu Tibar, lokaliza iha kilometru 10 Oeste Dili, iha Baía Tibar, Munisípiu Liquiça, hanesan infraestrutura prioritária ne’ebé identifika ona iha Planu Estratéjiku Dezenvolvimentu (PED) 2011-2030.

Projetu ho durasaun serbisu tinan tolu ne’e, hanesan konstrusaun nível internasionál, ne’ebé ezekuta liuhosi Timor Port SA ho modalidade Parseria Públiku Privada (PPP) entre konsórsiu Bolloré no Governu Timor-Leste.

Ba konstrusaun ne’e, Governu aloka millaun $130, enkuantu Timor Port no Bolloré hamutuk miliaun $140 totál millaun $270 ba faze inísiu. Totál investimentu orsamentu ba Portu Tibar to’o tinan 30 ho valór millaun $500.

Liuhosi konkursu internasional, Governu selesiona Bolloré Group (Parseiru Privadu) atu dezenvolve portu foun (green field port) ho modelu dezeñu, harii, ko-finansia, opera no transfere (Design Build Finance Operate & Transfer/DBFOT).

Bolloré Group nu’udar kompañia Francês koñesidu iha nível mundiál espesializada iha konsensaun portu no lojístika, no agora daudauk opera terminál kontentór hamutuk 16 iha nasaun oioin.

Atu hala’o dezenvolvimentu portu, Governu asina kontratu ho Timor Port S.A. (kompañia ne’ebé registradu iha Timor-Leste no na’in husi Bolloré Group) iha loron 3 juñu 2016 ba konsensaun tinan 30 nian, hafoin períodu konsensaun, Timor-Port S.A sei transfere fali portu internasionál ne’e (Portu Tibar) ba Governu Timor-Leste.

Tuir kontratu ho Governu, Timor Port S.A bele halo sub-kontratu independentemente ba serbisu konstrusaun no operasaun ba entidade seluk no asegura entidade ne’ebé envolve hodi kumpri ho espesifikasaun téknika referida iha Kontratu Konsensaun.

Nune’e, konsesionária lansa independentemente konkursu internasionál no konklui tiha ona konkursu ne’e ho kompañia selesionadu China Harbour Engineering Company (CHEC) nu’udar parte ne’ebé manan ba konstrusaun ba Portu Tibar iha loron iha 12 dezembru 2017.

Parte Governu estabelese ona Unidade Jestaun Portu Baía Tibar hodi dedika totalmente ba implementasaun projetu ne’e, ho profisionál sira ne’ebé iha esperiénsia ona, tantu nasionál no internasionál, ne’ebé kombina ho koñesimentu nesesáriu hodi jere akordu Kontratu Konsensaun durante faze konstrusaun (téknika, seguransa, saúde no ambiente no legál).

Previstu kais rua ho metru 630, bele simu 8700.000 kontentór iha tinan ida nia laran.

Alende ne’e, durante faze konstrusaun, iha projesaun katak sei kria empregu ba ema na’in 500 ne’ebé maioria ba timoroan, nu’udar kompromisu husi konsensionária.

Hetan Prémiu Mellor Projetu 2018 Iha Rejiaun Ázia Pasífiku

IJ Global fó prémiu “Mellor Projetu iha Tinan 2018” iha Rejiaun Ázia Pasífiku, ba Parseria Públiku Privadu (PPP) Portu Tibar iha Timor-Leste.

Prémiu IJ Global ba Projetu PPP Portu Tibar, nu’dar Mellor Projetu 2018 iha Rejiaun Ázia Pasífiku. Imajen Espesiál.

IJ Global hanesan organizasaun líder mundiál iha infraestrutura no finansiamentu projetu no prémiu ne’e anunsia iha loron 28 marsu 2019 iha Singapura.

Projetu Portu Tibar ne’e selesionadu entre projetu PPP ne’ebé realizadu iha país dezenvolvidu hotu iha Rejiaun Ázia Pasífiku.

Rekoñesimentu internasionál ne’e hanesan  dahuluk ba PPP ne’ebé dezenvolve iha Timor-Leste no nu’udar konkista boot ba Governu Timor-Leste. Nune’e mós hatudu dalan ba dezenvolvimentu husi projetu PPP ne’ebé fó rezultadu di’ak.

Jornalista: Julia Chatarina

Editór: Xisto Freitas

 

HAKEREK NO HATÁN

Please enter your comment!
Please enter your name here