Serimónia apoiu mobiliáriu (karteira) unidade 30 ba Eskola Ensinu Báziku Central (EBC) Mau-Meta Vila, Ataúro, ohin. Imajen Mídia PR

ATAÚRO, 18 setembru 2019 (TATOLI) – Espoza Prezidente Repúblika (PR), Cidália Nobre Guterres, liuhusi Gabinete Apoiu Atvidade Konjúje Prezidente Repúblika, apoiu mobiliáriu (karteira) unidade 30 ba Eskola Ensinu Báziku Central (EBC) Mau-Meta Vila, Ataúro, ohin.

Inan-nasaun agradese pedidu hosi Eskola EBC Mau-Meta Vila tanba hato’o ona difikuldade ne’ebé eskola infrenta liliu fasilidade hanesan karteira.

“Labarik mak futuru inan-aman, sosiedade no futuru nasaun nian. Maibé, ita hatene labarik sira sei hasoru difikuldade kona-ba direitu labarik nian sei tau iha kestaun. Tanba atu hetan edukasaun di’ak, Estadu tenke kria kondisaun di’ak ba nia oan sira. Bainhira kondisaun no fasilidade la to’o, sei afeta ba profesór sira atu hanorin no ba estudante sira atu estuda”, Cidália subliña.

Nia husu ba estudante sira iha Postu Administrativu Ataúro no territóriu Timor-Leste atu estuda maka’as, tanba nasaun nia futuru iha estudante sira-nia liman.

“Ita hakarak Ataúro-oan sira ba oin sai matenek, maibé tenke esforsa-aan”, Espoza Prezidente Repúblika enkoraja.

Tanba ne’e, nia husu ba estudante sira atu uza kadeira no meza ne’ebé iha ho kuidadu.

Entretantu, Diretór EBC Mau-Meta, Mariano Soares Saldanha, lori estudante no manorin sira-nia naran, hato’o agradese ba inan-nasaun ne’ebé apoiu ona kadeira no meza.

“Ha’u hato’o agradese ba Espoza Prezidente Repúblika tanba apoiu ona kadeira no meza mai ami, hodi fasilita estudante sira bele hala’o prosesu aprendizajen ho di’ak”, nia informa.

Antes ne’e, Prezidénsia Repúblika apoiu ona fasilidade hanesan ba eskola Ensinu Báziku Maukatar iha Munisípiu Covalima.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here