Eis Primeiru-Ministru, Kay Rala Xanana Gusmão, hamutuk ho traballadór no konsultan tékniku China Harbour Engineering observa serbisu konstrusaun Portu Tibar, kuarta (18/9/2019). Imajen Eugénio Pereira

DILI, 18 setembru 2019 (TATOLI)-Kompañia China Harbour Engineering (CHE) aterru ona rai henek ne’ebé kee sai husi tasi laran hodi aterru fila fali ba  tasi laran hamutuk  millaun rua metru kúbiku (m3) no falta rai henek  millaun ida metru kúbiku (m3) hodi kompleta aterru rai iha tasi Portu Tibar.

Werley Person nu’udar mós Konsultan no Enjeñeira Kompañia Timor Port, Nelida Fernandes Alves, esplika, agora daudaun projetu ne’e iha hela faze drenajen nian, ne’ebé sei hasai rai hamutuk millaun 3,5 metru kúbiku, antes hahú prosesu reklamasaun ba tasi husi ektare 28 no konstrusaun husi portu prinsipál.

Tuir dezeñu Portu sei harii ninia riin kuaze 600 ne’ebé sei fura husi tasi leten ba rai okos metru 70, kada riin ida téknikamente sei enxe fatuk ba tasi laran hamutuk kúbiku rihun hodi próteze Portu husi dezastre rai nakdoko.

“Agora daudauk  tama ona iha fase reklamasaun aterru ona rai millaun rua, falta millaun ida para kompleta atu haforsa fundasaun husi rai ne’e, depois ami presiza enxe fatuk hamutuk kúbiku millaun ida ba tasi laran no kada riin husi portu ne’e,” esplika Nelida Fernandes Alves ba jornalista, ohin, iha Portu Tibar.

Nia esplika, rai henek ne’ebé parte kompañia kee iha tasi laran maka uza hodi aterru fali ba tasi laran ne’ebé kompañia sira halo ona estudu kle’an jeotérmiku hatudu katak, rai henek kualidade di’ak liu hodi aterru fali ba tasi laran.

Nelida hatutan, prosesu serbisu foin halo tinan ida, tanba ne’e ekipa kontinua serbisu hodi aterru mós fatuk hamutuk ho kuantidade kúbiku rihun tau tama ba tasi okos.

Hafoin fura tiha rai kuak hodi harii besi riin portu nian, foin ekipa presiza fali rai henek no fatuk hodi halo konstrusaun ba portu Tibar too remata.

Iha fatin hanesan, Diretór Unidade Jestaun Projetu Portu Tibar, Rui Soares, esplika, bainhira Portu Tibar harii remata, Kompañia Bolloré sei monta fasilita  kompletu para uza rai de’it konteiner ne’ebé ró boot bele lori ba hatún iha Portu laran.

Rui hatutan, depois períodu konsesaun, Kompañia Timor-Port S.A sei transfere fila fali portu internasionál ne’e (Portu Tibar) ba Governu Timor-Leste.

Portu Tibar sei sai nu’udar “State-of-the-art port” ho ekipamentu modernu hodi bele garantia movimentu rápidu (lais) no efisiente iha konteiner no kargu.

Portu foun sei bele akomoda nabiu (ró ahi boot) liu Portu Dili no sei asegura kustu ba Freight (karegamentu) ne’ebé sei hamenus presu konsumidór.

Avaliasaun detallu ba impaktu ambientál no sosiál hala’o husi parte konsesionária banati tuir padraun internasionál, inklui medida hodi evita, hamenus (mitigate) ka halo balansu ba impaktu ambientál.

“Ita nia portu ne’e sei simu ró ho kuantidade tula konteiner sete (7) míl bele mai para, tanba Portu naruk metru 300 ró boot no ró ki’ik bele mai para no portu ne’e bele akumula konteiner rai iha portu millaun ba tinan ida,” tenik Rui.

Projetu ne’e implementa nu’udar Parseira Públiku Privada (PPP) atu lori esperiénsia no “teknolojia know-how” husi operadór portuáriu nivel mundiál ba Timor-Leste, introdús inovasaun, promove efisiénsia operasionál no garantia prestasaun servisu ne’ebé di’ak ba públiku, no importante liu, Governu bele transfere risku boot ba parseiru privadu, inklui risku konstrusaun atrazu, kustu exesivu, tráfiku, efisiénsia operasaun no seluk tan.

Fatin hanesan, Eis Primeiru Ministru, Kay Rala Xanana Gusmão dehan, Portu Tibar sei fó benefísiu ekonomia Timor-Leste iha futuru.

Xanana dehan, Portu ne’e halo ho kualidade internasionál, no Timor-Leste sai fatin ida atu simu kualkér ró husi ASEAN bainhira atu para hatún sasán transit liu husi Portu Timor  sai fali ba nasaun seluk.

“Ita nia portu ne’e kualidade ne’ebé sei fó benefísiu ekonomikamente ba ita nia rai liu-liu imi nia oan sira aban bairua moris mai mós portu ne’e sei dura nafatin,” tenik Xanana ho espresaun kontente.

Jornalista : Eugénio Pereira

Editór       : Francisco Simões

 

1 KOMENTÁRIU

  1. Ba hau desenvolvimento bebê balão husi China, mudar buat nebe disk hodi ajuda povo Timor leste, Maibe meta buat negatividade ruma iha kotuk,mudar ema kit seidauk Jatene dediak objectivo servisu companhia China nee.

HAKEREK NO HATÁN

Please enter your comment!
Please enter your name here