Prezidente Autoridade Munisíoiu Baucau, António A. Guterres. Imajen/TATOLI

DILI, 18 setembru 2019 (TATOLI) – Autoridade Munisípiu Baukau konsidera tetu fiskál 2020 millaun $3 ne’ebé Ministériu Finansa fó la sufisiente atu ezekuta, tanba ne’e liuhusi diskusaun ho Komité Revizaun Orsamentu Polítika, tersa (17/09/2019) Autoridade Munisípiu Baukau husu tan adisionál millaun $17 hodi ezekuta Programa Dezenvolvimentu Integradu Munisipál (PDIM).

Notísia Relevante :Suku Tolu iha Baucau Seidauk Asesu Eletrisidade  

Pedidu Autoridade Munisípiu Baukau nian ne’e sei iha diskusaun Komisaun Revizaun Orsamentu iha nivel tékniku atu la bele afeta ba Orsamentu Jerál Estadu (OJE 2020.

“Ami propoin de’it, maibé depende KROP ne’ebé lidera rasik husi Primeiru-Ministru, Taur Matan Ruak, ne’ebé orienta ona ba tékniku sira atu labele iha duplikasaun programa husi Ministériu no Autoridade Munisípiu,” esplika Prezidente Autoridade Munisípiu Baukau, António Augusto Guterres.

Tuir planu millaun $5 husi proposta adisionál ne’e, Munisípiu Baukau sei ezekuta ba estrada rural ne’ebé liga suku no aldeia, Postu Administrativu, bee moos iha área rural, irrigasaun no seluk tan.

Husi item transferénsia públika, autoridade munisipál hakarak aumenta osan ba programa merenda eskolár kada estudante $1.00 kada loron tanba $0.50 antes ne’e la sufisiente relasaun ho presu sasán iha merkadu kontinua sa’e.

Orsamentu $10.000 sei aloka ba grupu komunitáriu hodi hakbiit sira ninia atividade kooperativa no $100.000 aloka ba postu administrativu sira hodi korresponde situasaun emerjénsia hanesan rai monu, estrada kotu no ai-tohar.

Nune’e mós $30.000 sei aloka ba  grupu kooperativa joven no feto sira hodi hakbiit ekonomia komunidade rurál.

La’ós ne’e de’it, iha mós planu atu aumenta subsídiu ba membru konsellu suku, selu pesoál ezgotu no mós sosa motorizada no komputadór ba funsionáriu sira tanba daudaun ne’e sira uza komputadór tuan ne’ebé sosa kedas iha governasaun UNTAET.

“Atu asegura no mellora polítika desentralizasaun ita mós sei presiza tan rekursu umanu atu bele garante tékniku hodi bele fasilita iha munisipiu mak presiza orsamentu milloens $17 maibé tinan-tinan ne’e só $3 millaun  ne’e la-aguenta,” afirma António Guterres.

Nia hatete, bainhira KROP aprova osan adisionál ne’e sei apoiu autoridade Munisípiu Baukau hodi hadi’a kondisaun mínimu ba polítika desentralizasaun tanba tuir planu iha tinan 2020 governu sei halo avaliasaun kona-ba preparasaun mínimu kada munisípiu hodi reforsa polítika desentralizasaun podér.

Husi tetu fiskál millaun $3 ba Munisípiu Baukau iha tinan oin sei ezekuta ba saláriu vensimentu, bens serbisu no transferénsia públika

Jornalista          : Osória Marques

Editór                : Francisco Simões

HAKEREK NO HATÁN

Please enter your comment!
Please enter your name here