DILI, 18 setembru 2019 (TATOLI)- Embaixada Austrália liu husi Adidu Migrasaun ne’ebé destaka Dili koopera ho Diresaun Nasionál Serbisu Migrasaun fó treinamentu ba ekipa Serbisu Migrasaun kona-ba oinsá ezamina dokumentu ne’ebé liga ba serbisu migrasaun nian.
Notísia Relevante : Agostinho da Silva Troka Boavida Ribeiro Lidera Servisu Migrasaun
Diretór Jerál Servisu Migrasaun Superintendente Polisia Agostinho Gomes dehan, formasaun ne’e importante, tanba Adidu Migrasaun Embaixada iha Austrália mak fó formasaun direta ba ekipa serbisu migrasaun.
Agostinho Gomes ba jornalista iha edifísiu Serbisu Migrasaun, Ministériu Interiór, Vila Verde, Dili, ohin, informa, formasaun ne’e pozitivu tebes hodi kapasita membru sira hodi hadi’a administrasaun serbisu sira liu-liu haree dokumentu importante sira liga ba serbisu migrasaun nian.
“Ho kapasitasaun sira ne’e atu suporta membru sira atu hala’o sira nia serbisu ho profisionál tuir lei no tuir prosedimentu ne’ebé iha,” hateten Agostinho Gomes.
Adidu Migrasaun Austrália iha Dili ajuda Funsionáriu DNSM barak hetan treinamentu inklui tuir kursu Ingles iha LELI no treinamentu iha Brisbane, Austrália.
Jornalista : Eugénio Pereira
Editór : Francisco Simões
