Koordenadór Jerál Komisaun Organizadora ba selebrasaun tinan 20 Konsulta Populár no Misaun INTERFET, Virgílio Smith (Klaran), akompaña Husi Vise-Koordenadór Jerál, Juvencio de Jesus Martins (loos), nomós Koordenadór Sentru Mídia, José da Costa (Karuk), inklui Komisaun Organizadora sira, hala’o Konferénsia Imprensa, iha Palásiu Governu, kuarta (18/09/). Imajen TATOLI/Egas Cristovão

DILI, 18 setembru 2019 – Koordenadór Jerál Komisaun Organizadora ba Selebrasaun Tinan  20 Konsulta Populár no Misaun International Force for East Timor (INTERFET), Virgílio Smith, hateten atividade ba selebrasaun Misaun INTERFET sei hahú aban (19/9).

“Atividade ba ámbitu selebrasaun ninian sei hahú aban, maibé iha atividade lubun ida mak la’o uluk ona komesa hosi loron 12 setembru no ohin sei iha atividade balun ne’ebé veteranu no eis membru INTERFET sira hala’o iha Same, Manisípiu Manufahi”, tenik Virgílio Smith liuhosi konferénsia imprensa, iha Palásiu Governu, kuarta ne’e.

Nia dehan, aban konvidadu espesiál sira hanesan Jenerál Peter John Cosgrove (ne’ebé lidera Misaun INTERFET iha 1999) ho ninia delegasaun to’o iha Dili, no sira sei ba vizita Centro Nasional Chega (CNC) no mós rate Santa Cruz.

Nune’e mós sei vizita ba Arquivo e Museu da Resisténcia Timorense no sei aprezenta filme dokumentáriu ho títulu “Then and Now 99-19”, ne’ebé prodúz hosi Max Stahl.

Virgílio Smith dehan tan, iha loron 20 setembru, tuku 9 dader, konvidadu hotu sei konsentra iha Palásiu Governu hodi hasa’e Bandeira tuir disiplina Militár no iha tuku 10:30 sei iha Marça da Memória.

“Marsa ne’e sei hala’o hosi veteranu Austrália, Nova Zelándia no mós Timor-Leste ninian, hahú hosi Palásiu Governu ba Sentru Konvensaun Dili (CCD-sigla Portugés)”, nia akresenta.

Koordenadór Jerál ba atividade ne’e hatutan: “Aproveita oportunidade ne’e atu apela ba populasaun no mós ba estudante sira, tuir ami-nia pedidu ba Ministériu Edukasaun katak bainhira Marça da Memória sai hosi Palásiu Governu, populasaun, komunidade no joven sira ne’ebé mak iha Dili laran, hamriik iha estrada sorin sira hodi asisti marsa ne’ebé sei prezide husi Peter John Cosgrov, Primeiru-Ministru, taur Matan Ruak no mós entidade seluk”.

Nia mós informa, iha loron hanesan, iha lorokraik tuku 4:00, sei realiza jogu futeból ne’ebé sei hala’o iha Estádiu Munisipál Dili.

“Peter Cosgove to’o iha estádiu ho bainaka importante sira (Verry Important Person) seluk hodi hala’o programa futeból ne’ebé sei joga entre ekipa rua hosi parte Peter Cosgrove no ekipa hosi Xanana Gusmão. Futeból ne’e sei hala’o iha minutu lima nia laran, hanesan ezibisaun onra ida”, nia subliña.

Aleinde ne’e, sei hala’o mós jogu futeból entre ekipa FALINTIL- Forsa Defeza Timor-Leste (F-FDTL) ho ekipa husi Forsa Defeza Austrália.

“Ekipa rua ne’e sei hala’o jogu amigável hodi ramata atividade selebrasaun ba loron misaun INTERFET nian iha Timor-Leste”, nia konklui.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here