Ministra Edukasaun, Juventude no Desportu (MEJD), Dulce de Jesus Soares tara tais no entrega aifunan ba atleta Teófilo Freitas. Imajen Mídia MEJD

DILI, 17 setembru 2019 (TATOLI) – Atleta defisiente hosi Modalidade Atletizmu, Teófilo Freitas, informa osan subsidiu ne’ebé nia simu hosi Governu liuhosi Sekretáriu Estadu Juventude no Desportu (SEJD) tama ona iha nia konta bankária.

Osan ne’e Governu oferese tanba Teófilo hatudu prestasaun di’ak iha eventu internasionál Asian Para Games, tinan kotuk, iha Jakarta, Indonézia, hodi hetan medalla osan mean.

“Natón 20 agostu liubá ne’e, ha’u simu kuadru ne’ebé hakerek osan nia montante  rihun $100 ne’e, liu loron rua ha’u ba iha banku haree osan tama ona. Maibé, ko’a tiha pursentu 10 ba Estadu,” tenik Teófilo ba Agência Tatoli iha Jináziu Dili, tersa ne’e.

Lee mós: Governu Transfere Ona Subsídiu Ba Atleta Prestadu

Nia dehan, nia sente kontente tebes ho subsídiu ne’ebé mak Governu haraik ona ba nia no nia konsidera ida ne’e hanesan motivasaun ida ba nia atu haka’as-aan nafatin nune’e bele hatudu prestasaun di’ak iha eventu internasionál seluk tuir mai.

Entretantu, novembru tinan ne’e, Asian Para Games sei realiza iha Manila-Filipina no Teófilo kontinua partisipa nafatin.

Tanba ne’e, nia promete sei hatudu prestasaun di’ak liu tinan kotuk iha Jakarta, Indonézia, nune’e bele hamorin tan Timor-Leste nia naran.

“Iha Asian Para Games tinan ida ne’e, ha’u sei partisipa nafatin. Maibé, kuandu nafatin kompete iha metru 1500, ha’u promete sei hatudu rezultadu di’ak. Agora, ha’u prepara-aan hela,” nia haktuir.

Relasiona ho fasilidade ba nia hodi hala’o treinamentu, sufisiente ona. Tanba ne’e, kada loron sempre hala’o treinamentu iha Estádiu Munisipál Dili.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here