Ministru Reforma Lejizlativa no Asuntu Parlamentár, Fidelis Manuel Leite Magalhães (karuk), Ministra Finansa ein-Ezersísiu, Sara Lobo Brites (klaran), Primeiru-Ministru, Taur Matan Ruak (loos) partisipa iha revizaun ba pakote OJE 2020, iha salaun Ministériu Finansas, Aitarak-Laran, Dili, Tersa (10/09/2019). Imajen/Tatoli.

DILI, 17 setembru 2019 (TATOLI) – Iha aprezentasaun envelope fiskál iha Komité Revizaun Orsamentu Polítika ba Orsamentu Jerál Estadu (OJE) 2020, Primeiru-Ministru (PM), Taur Matan Ruak, la autoriza pedidu sira ne’ebé aprezenta hosi liña ministeriál tantu Instituisaun Estadu no Ajénsia Públika Autónoma sira, atu sosa veíkulu.

“Pur-ezemplu, iha Ministériu Defeza iha funsionáriu na’in 34, sira iha karreta 33, falta de’it ida para 34 atu hanesan ho funsionáriu sira. Ne’e labele! Tanba, ita tenke halo polítika foun hodi evita gastu súperfluo (ezajeradu) ba mina no manutensaun. Osan sira ne’e divia ita uza ba hadi’a ita-nia povu nia moris”, dehan PM Taur iha salaun Ministériu Finansa (MF), tersa ne’e.

Tuir pájina Gabinete Primeiru-Ministru ne’ebé Agência Tatoli asesu, razaun Xefe Governu la autoriza sosa veíkulu, tanba dadaun ne’e ekipa liña ministeriál, ne’ebé lidera hosi MF halo hela levantamentu ba viatura Estadu nian iha liña ministeriál, Instituisaun Estadu no Ajénsia Públika Autónoma sira hodi hola dadus kona-ba kondisaun karreta no motorizada sira no bainhira levantamentu hotu ona, Governu sei halo polítika foun kona-ba oinsá utilizasaun veíkulu Estadu liuhosi kria Rezolusaun Governu ne’ebé tuir planu sei fó sai iha tinan ne’e.

Xefe Governu argumenta liután katak, dadaun ne’e, kondisaun estrada iha kapitál Dili di’ak, nune’e mós liga ba munisípiu sira hahú di’ak ona no balun iha hela andamentu. Tanba ne’e, ba oin la presiza sosa karreta Four-wheel drive, maibé sosa de’it karreta natón ba kargu xefia sira no auto-karru ba funsionáriu sira hodi evita gastu súperfluo ba kombustível no manutensaun.

PM Taur mós ko’a pedidu kona-ba harii edifísiu sira, tanba Governu ne’ebé nia lidera dadaun ne’e buka atu tau atensaun maka’as uluk ba iha kestaun sosiál tuir ezijénsia povu nian, hanesan bee-moos, edukasaun, agrikultura, saúde, abitasaun no seluk tan.

Aprezentasaun orsamentu dadaun ne’e sei la’o hela iha Ministériu Finansa (MF), hosi loron 9 setembru to’o 21 setembru 2019, tuir kalendáriu.

Tetu fiskál ninia valór iha Orsamentu Jerál Estadu (OJE) 2020 maka billaun $1,6.

OJE 2020 ne’e sei hetan aprovasaun husi Konsellu Ministru iha soru-mutuk loron 27 setembru 2019 no sei haruka ba Parlamentu Nasionál iha loron 15 outubru, nune’e iha dezembru bele hetan ona promulgasaun hosi Prezidente Repúblika.

Jornalista: Julia Chatarina

Editór: Xisto Freitas

 

 

HAKEREK NO HATÁN

Please enter your comment!
Please enter your name here