Sesaun plenária Parlamentu Nasionál. Imajen dok. Tatoli

DILI, 17 setembru 2019 (TATOLI) – Orsamentu privativu Parlamentu Nasionál (PN) ba tinan 2020 nian aprovadu iha debate jeneralidade, ohin, iha Parlamentu Nasionál.

Ba tinan 2020, Parlamentu Nasionál simu tetu fiskál hosi Governu ho montante millaun $14, maibé Parlamentu Nasionál prepara ninia orsamentu privativu rasik iha ne’ebé nia montante sa’e ba millaun $17.909.531.

Hosi orsamentu millaun $17.909.531 ne’e kompostu hosi saláriu no vensimentu millaun $5.945.228, Bens no Sevisus millaun $9.693.912, kapitál menór millaun $1.016.391, kapitál no dezenvolvimentu rihun $80.000 no transferénsia millaun $1.174.000.

Purtantu, orsamentu ne’e aprova iha jeneralidade ho votu a-favór 35, kontra 4 no abstensaun 12.

Entretantu sálariu no vensimentu aloka ba saláriu no oras estraordinária hamutuk millaun $5.945.228.

Bens no Servisu kompostu hosi viajen lokál ho orsamentu $656.440, viajen estranjeiru millaun 3.006.487, formasaun profisionál no semináriu rihun $474.667, encargos com instalações $253.707, combustíveis de operação de Veículos $149.204, manutensaun ba veíkulu $125.673, materiál no fornesimentu ba eskritóriu $137.000, materiál no fornesimentu operasionál ho orsamentu $177.330, manutensaun ba ekipamentu no edifísiu $150.000, serbisu operasionál ho orsamentu $245.701, asisténsia téknika millaun $3.531.186, serbisu tradusaun $35.500, serbisu diversu sira seluk $426.717, pagamentu de quotas $144.300, serviços catering $180.000.

Kapitál menór kpmposta compra de veículos $644.000, ekipamentu informátika $104.850, ekipamentu seguransa $16.390, ekipamentu komunikasaun $7.054, ekipamentu diversu sira seluk $176.387, mobiliáriu $59.150, ekipamentu eskritóriu sira seluk $3.700, ekipamentu água $4.860.

Entretantu kapitál dezenvolvimentu, orsamentu $80.000 prevé de’it ba ativos de infraestruturas-serviços e equipamentos menores. Transferénsia públikas ho montante millaun $1.174.000 prevé de’it ba konsoções públicas.

Tuir lei númeru 12/2017, 24 maiu, kona-ba Organizasaun no Funsionamentu Administrasaun Parlamentár (LOFAP), Parlamentu iha personalidade jurídika no rejime privativu hosi aprova Parlamentu nia osan rasik.

Xefe Bankada Partidu Demokrátiku (PD), António da Conceição, espera Sekretária Jerál PN foun, Cedelizia Faria dos Santos, bele halo programa foun iha Parlamentu Nasionál.

“Ha’u hakarak haree intermu diferensa orsamentu. Sá mudansa mak ita halo iha Parlamentu ne’e implika ba aumentu ba orsamentu, seráke ita aumentu estrutura ruma iha Parlamentu”, deputadu ne’e levanta iha plenária, tersa ne’e .

Nune’e mós, Xefe Bankada CNRT, Duarte Nunes, dehan orsamentu ba Parlamentu tinan 2020 boot tebes, tanba ne’e presiza hadi’a iha jestaun.

“Ita presiza hadi’a iha jestaun tanba millaun $17 ne’e boot”, hateten Duarte Nunes.

Hatán ba preokupasaun ne’e, Diretora Jestaun Finansa Parlamentu Nasionál, Zélia Maria Fátima da Costa, esplika Parlamentu iha planu estratéjiku rasik, garante ezersísiu funsaun Parlamentu nian, promove kultura tranparénsia iha Parlamentu, fomenta relasaun internasionál no kooperasaun Parlamentár, konsolida funsionamentu administrativu Parlamentu nian no programasaun transversál.

Nia esplika, implementasaun ho objetivu estratéjiku liuhosi kuadru rekursu umanu Parlamentu nian.
Nia dehan, Parlamentu iha funsionáriu permanente 145, na’in 28 nomeadu iha Komisaun Espesializada sira no na’in 26 nomeadu iha kargu Diresaun Xefia nian.

Nia fiar ho funsionáriu ne’ebé iha sei implementa planu Parlamentu nian iha 2020 di’ak liu.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here