Administradór Munisipiu Lautein, Jeferino dos Santos Sequeira. Imagen: Media MF.

DILI 17 setembru 2019, (TATOLI) – Administradór Munisípiu Lautein, Zeferino dos Santos Sequeira, informa Munisípiu Lautein aprezenta proposta adisionál millaun $8 iha Komité Revizaun Orsamentu Polítika (KROP) hodi kompleta estrutura.

Administradór Munisípiu Lautein ne’e relata tuir pakote fiskál ne’ebé Ministériu Finansas (MF) atribui hamutuk millaun $3-resin.

“Ami husu adisionál hamutuk millaun $8 ho razaun atu halo rekrutamentu ba kargu diresaun xefia sira no mós funsionáriu para prienxe organigrama munisípiu nian, nune’e bainhira halo avaliasaun ba kondisaun mínimu entaun munisípiu preparadu ona”, Zeferino afirma ba Tatoli hafoin partisipa reuniaun KROP iha Ministériu Finansa, Aitarak-Laran, ohin.

Autoridade másima Lautein ne’e salienta pakote fiskál ne’ebé fó hamutuk millaun $3-resin ne’e ba kategoria tolu hanesan saláriu no vensimentu ne’e ema nia direitu, bens no servisu ne’e ba manutensaun karreta, kombustivel no transferénsia públika ne’e subsídiu ba líder komunitária sira no ne’e baibain ona no laiha prioridade foun.

Tanba ne’e maka husu adisionál para tau prioridade ba rekrutamentu funsionáriu foun hamutuk 17, nune’e prienxe estrutura.

Bainhira husu kona-ba mudansa iha munisípiu, Administradór ne’e dehan laiha tanba laiha orsamentu iha kapitál dezenvolvimentu.

“Orsamentu iha kapitál dezenvolvimentu rasik laiha ne’e, oinsá atu halo mudans. Tanba durante tinan hirak ne’e envelope fiskál ne’ebé atribui atu sustenta ba atividade rutina de’it, laiha kapitál orsamentu ida mak espesiál ba iha dezenvolvimentu”, Zeferino katak.

Munisípiu Lautein kompostu hosi postu administrativu lima, suku 34, aldeia 151, no totál populasaun rihun 87.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here