Advogadu privadu kompañia Marino Entreprise, Pedro Aparício. Imajen/Dencio

DILI, 17 setembru 2019 (TATOLI) – Advogadu ba kompañia Marino Enterprise, Pedro Aparício, rekoñese katak empreza ne’e  seidauk hetan lisensiamentu ambientál husi Autoridade Nasionál Petróleu no Minerál (ANPM) no Sekretáriu Estadu Ambiente (SEA).

“Uluk ami halo tiha ona esplorasaun ba fatuk iha área Kaitehu, maibé ami para tiha tanba seidauk iha lisensa ambientál”, Advogadu Marino Enterprise dehan liuhosi konferénsia imprensa iha Otél Timór, ohin.

Bainhira hapara esplorasaun fatuk ne’e, nia dehan empreza Marino Enterprise halo karta pedidu ba SEA no ANPM hodi husu lisensa ambientál atu hala’o atividade ne’e iha área Kaitehu, Aldeia Mota Ikun, Suku Mota Ulun, Postu Administrativu Bazartete, Munisípiu Likisá.

“Ami hatama pedidu ba Sekretáriu Estadu Ambiente no ANPM, maibé sira hateten labele fó lisensa ambientál bainhira imi (empreza Marino) seidauk iha kontratu arrendamentu husi Ministériu Justisa”, relata.

Nune’e, empreza halo karta ba Ministériu Justisa (MJ) atu halo kontratu arrendamentu, maibé MJ rejeita pedidu ne’e.

“Agora, prosesu ida ne’e la’o bainhira kompañia China Harbour hetan kontratu arrendamentu ba rai iha Kaitehu ne’ebé pretense ba Estadu nian no sira hetan tan lisensa ambientál mós husi ANPM ba halo esplorasaun fatuk, maibé lisensa hirak ne’e ba rai ne’ebé pertense ba Estadu, la’ós ami-nia rai privadu atu kompañia China Harbour uza hotu sein kontratu ho ami (Marino Enterprise)”, nia dehan.

Advogadu ne’e hatutan pedidu ba MJ ne’e ho razaun rua tanba kompañia Marino Enterprise halo uluk ona esplozaun fatuk iha área ne’e no rai privadu besik liu iha área ne’e.

“Ami agora la halo esplorasaun fatuk ona iha área ne’ebá”, katak.

Antes ne’e, Sekretáriu Estadu Ambiente (SEA), Demétrio do Amaral, hatete Governu liuhosi SEA no ANPM seidauk atribui lisensa ambientál ba kompañia Marino Enterprise atu hala’o atividade iha suku Mota Ulun.

SEA mós relata dezde mandatu Oitavu Governu hahú husi jullu 2018 to’o 2019 konsege emite ona lisensa ambientál 200-resin ba empreza sira.

Aléinde ne’e, Vise-Prezidente ANPM, José Gonçalves relata katak dezde 2018 emite ona lisensiamentu ambientál hamutuk 50 inklui ona negósiu iha área petróleu no minerál.

Iha tinan ne’e, ANPM rasik planeia emite tan lisensa ba empreza iha área petróleu no minerál hamutuk 10.

Notísia relevante : Governu Seidauk Atribui Lisensa Ambientál ba Kompañia Marino Enterprise

Jornalista : Florencio Miranda Ximenes

Editora : Maria Auxiliadora

1 KOMENTÁRIU

  1. Hakerek hotu, antes publika husu atu editor le fali tan lai, tamba iha palavra balun nebe ita ladun intende, no iha frase balun nb maka la dun iha koneksaun, obrigado

HAKEREK NO HATÁN

Please enter your comment!
Please enter your name here