iklan

EDUKASAUN, HEADLINE

Kuidadu Imajen Timor-Leste

Kuidadu Imajen Timor-Leste

Mapa Timor-Leste

DILI, 17 setembru 2019 (TATOLI)–Estudante Ensinu Sekundáriu na’in lima ne’ebé sei ba tuir kompetisaun kona-ba siénsia no matemátika iha Malázia hamutuk partisipante sira kuaze nasaun 120, inklui mós estudante Eskola Sekundária Jerál (ESG) 4 Setembru UNAMET, Dili, Veronica Diaz Monteiro no Marlina Marques Cabral.

Tanba ne’e, Diretór Interinu ESG 4 Setembru, Sergio dos Santos da Cruz husu ba estudante sira inkluzivamente nia estudante na’in rua atu hamutuk ho sira seluk atu kontinua kuidadu imajen Timor-Leste nian iha Malázia.

Diretór Interinu ESG 4 Setembru UNAMET,Imajen/Tomé Amado

Katak, disiplina no hatudu hahalok di’ak iha ema nia rain, rona orientasaun husi superiór sira ne’ebé akompaña.

“Ha’u kontente ho imi-nia susesu. Ha’u husu ba imi na’in rua tenke hatudu disiplina. Imi na’in rua sai husi Timór lori estadu, nasaun, ministériu (edukasaun) no eskola nia naran,” hateten Ezekutivu Interinu, Sergio dos Santos bainhira despede ho estudante na’in rua ne’e hamutuk ho manorin na’in sira iha ESG 4 Setembru, UNAMET, Balide, Dili, tersa (17/09/2019).

Diretór Sergio dos Santos ne’e esplika katak hanesan ema no estudante iha ambisaun atu sai ida ne’ebé di’ak liuhusi maluk sira seluk.

Nune’e mós iha kompetisaun ne’ebé mak na’in rua ho kolega na’in tolu seluk hamutuk atu luta iha Malázia ne’e buat ida la fasil no kaman.

“Maibé saida mak prepara ona durante ne’e sei motiva imi iha ne’ebá. Buka manán esperiénsia atu fila mai bele kontribui ba eskola no mós bele tulun fali kolega sira seluk. Ami la ezije rezultadu manan ka lakon maibé ami hotu husu nafatin imi na’in rua nia komportamentu di’ak atu foti imajen eskola nian ba futuru,” hateten manorin na’in ne’e.

Enkuantu, estudante Marlina Marques Cabral orgullu tanba bele inklui mós estudante sira seluk hodi reprezenta Timor-Leste hodi ba partisipa iha kompetisaun kona-ba siénsia no matemátika ne’ebé mak sei hala’o iha Malázia.

No, tuir nia, orgullu mós tanba bele reprezenta ESG 4 Setembru UNAMET, Dili. Tanba ne’e, kompromete katak lia-menon husi manorin na’in no superiór sira  nu’udar “bukae” ida no sei la husi monu Timor-Leste nia imajen iha rai li’ur.

Tuir planu, estudante na’in rua hamutuk ho kolega na’in tolu seluk sei dezloka ba Malázia iha loron 17 setembru 2019 no fila mai Timor-Leste iha loron 23 setembru 2019.

Notísia relevante:Estudante Eskola Sekundária Haat Selesionadu Sei Kompete Ho Estudante Husi País 120 Iha Malázia

 Jornalista : Tomé Amado

Editór       : Rafy Belo

iklan
iklan

Leave a Reply

iklan
error: Content is protected !!