Ekipa Komisaun Amizade no Rekonsiliasaun Aceh, Indonézia, hasai hamutuk ho Xefe Kaza Sivíl Prezidénsia Repúblika, Francisco de Vasconselhos. Imajen Mídia PR

DILI, 17 setembru 2019 (TATOLI) – Komisaun Verdade no Rekonsiliasaun hosi Aceh, Indonézia, vizita Timor-Leste atu fahe esperiénsia ba malu no apriende hamutuk ho Komisaun Verdade Amizade Timor-Leste, durante nia serbisu oinsá rezolve problema pasadu ne’ebé haree hosi aspetu umanidade.

Komisaun ne’e hasoru malu ho Xefe Kaza Sivíl iha Gabinete Prezidénsia Repúblika, Bairru Pité, Dili, ohin.

Hafoin hasoru malu ho Xefe Kaza Sivíl, vise Prezidente Komisaun Verdade no Rekonsiliasaun Aceh, Efizain hateten komisaun ne’e hakarak apriende hosi esperiénsia Timor-Leste (TL) tanba Aceh moris iha konflitu nia laran durante tinan 30 no foin asina akordu kona-ba rekoperasaun dame iha tinan 15 liubá.

Aceh mós foin estabelese ninia Komisaun Verdade no Rekonsiliasaun iha tinan tolu liubá no presiza apriende barak hosi Timor-Leste (TL).

Buat ne’ebé importante liubá delegasaun hosi Aceh ne’e katak esperiénsia hosi eis gerileiru sira oinsá rezolve problema sira liliu vítima sira kona-ba konflitu pasadu.

Tanba ne’e, Efizain haktuir Xefe Kaza Sivíl, Francisco de Vasconselhos nia opiniaun katak, tuir esperiénsia Timor nian, iha kazu barak ne’ebé presiza rezolve liuhusi dalan rekonsiliasaun no serbisu hamutuk atu dezenvolve futuru ne’ebé di’ak liu.

Efizain esplika liután, hosi esperiénsia ne’ebé mak hetan iha Timor-Leste hanorin komisaun ne’e, oinsá aplika iha Aceh liliu kona-ba dezenvolvimentu ne’ebé kompriensivu iha kontestu autonomia espesiál iha Indonézia oinsá rezolve konflitu sira iha pasadu.

Frizain rekoñese katak durante estadia iha Timor-Leste, hetan lisaun no esperiénsia barak kona-ba Timor Leste nu’udar nasaun foun ne’ebé harii memorializasaun, kurríkulu no eskema rekoperasaun ba vítima sira no komisaun ne’e rasik promete sei uza ida ne’e atu aplika iha sira-nia situasaun iha Aceh no Indonézia.

Entretantu, Diretór Centro Nacional Chega (CNC), Hugo Fernandes ne’ebé akompaña delegasaun ne’e hateten ohin CNC serbisu hamutuk ho Association Justice and Rihgts (AJAR) Indonézia ho AJAR Timor-Leste no mós Komisaun Verdade no Rekonsiliasaun Aceh halo interkámbiu ida hosi Aceh no mós Governu Sentrál Indonézia iha Jakarta hodi fahe esperiénsia ba malu liliu Komisaun Verdade no Rekonsiliasaun Aceh ne’ebé foin harii iha tinan tolu liubá komesa halo ona serbisu.

Durante loron hirak iha Timor, ekipa interkámbiu ne’e, hasoru malu ho parte Gabinete Prezidente Repúblika, hasoru malu mós ho Primeiru-Ministru, Taur Matan Ruak, atu husu esperiénsia Timor nian, ba assuntu rekonsiliasaun no oinsá halo reparasaun ba vítima sira partikulármente liuhusi Komisaun Aceh nian, oinsá halo reintegrasaun ba antigu kombatente sira fila fali ba vida sivíl.

Nia hatutan, vizita ne’e, sira hosi Aceh mai apriende oinsá Timor-Leste nia prosesu durante ne’e la’o, depois sira tetu fali bele ajuda sira iha serbisu ne’ebé mak halo iha Aceh.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here