Adjuntu Komisariu KAK, Alexandre Freitas. Imajen/Domingos Piedade

DILI, 17 setembru 2019 (TATOLI) –Adjuntu Komisáriu Komisaun Anti Korrupsaun (CAC-sigla portugés)  ba Apoiu Serbisu no Kooperasaun, Alexandre F.G. Freitas, propoin ba iha Ministériu Reforma Lejizlativa no Asuntu Parlamenteres (MRLAP) atu halo estudu kle’an ba problema oi-oin iha kada ministériu, molok halo reforma administrasaun públika, se lae kuandu Governu ida sa’e fali la halo programa ne’e hodi prejudika osan Estadu de’it.

Notísia Relevante : MRLAP Sensibiliza Reforma Administrasaun Públika

“Ha’u hanoin molok reforma ida nee, presiza identifika, sistemátiku no diagnostika didi’ak, entaun MRLAP tenke haree ida nee. Ita nia frakeza iha ne’ebé tanba ita hakarak Estadu nee lao la bele kotu-kotu,” hatete Alexandre F.G. Freitas, ohin, bainhira partisipa workshop Reforma Administrasaun Públika, iha salaun MSSI, Caicoli,  Dili.

Alexandre konsidera polítika MRLAP hodi halo reforma administrasaun públika  polítika di’ak, maibé presiza haree ninia kontextu hodi define problema saida, iha kada ministériu, katak saida mak iha ona no saida mak seidauk iha atu bele hadi’a di’ak liu tan.

Assessor ba Gabinete Inovasaun no Administrativa (GIA) MRLAP, Fausto Maria Gama

Iha biban hanesan, assessor ba Gabinete Inovasaun no Administrativa (GIA), Fausto  Maria Gama, katak reforma administrasaun publika iha tinan 2019 – 2023 la’ós tur-tur iha de’it, maibé reforma ida nee, elabora husi identifikasaun husi estudu sira ne’ebé mak halo tiha ona anterior, programa sira ne’ebé mak halo tiha ona iha Governu anterior sira.

Por ezemplu, uluk iha sekretáriu estadu fortalesimentu institusionál halo tiha ona diagnostika ba instituisaun estadu sira hotu, liuliu ba ministériu sira hotu hodi deskobre erru balun iha Ministériu no ajénsia estadu balun.

“Ha’u hanoin husi diagnostika nee mak hatudu katak iha problema barak ne’ebé mak presiza atensaun atu hadi’a mak hanesan problema prestasaun serbisu ne’ebé mak lori tempu naruk hanesan kona ba pozisaun sira katak dalaruma ministériu rua lahanesan halo serbisu ne’ebé mak hanesan mak  Trusted Internet Connections (TIC.IP) no Ministériu Transporte Komunikasaun halo liu husi Autoridade Nasional Komunikasaun (ANC) halo konsidera serbisu rua nee hanesan de’it,” nia esplika.

Nia hatutan, iha Governu anterior mós estabelese ona komisaun nasionál ba reforma administrasaun públika ne’ebé mak hala’o tiha ona serbisu nee.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here