Diretór Ezekutivu Fundasaun Mahein, João Almeida Imajen/Eugénio Pereira

DILI, 17 setembru 2019 (TATOLI)- Organizasaun Naun Governmental Fundasaun Mahein (FM) husu ba Komandu Polisia Nasionál Timor -Leste (PNTL) atu reativa Operasaun “Aplika Lei, Dili Hakmatek” hodi evita kazu krime iha kapitál Dili.

Notísia Relevante : FM Husu Prosesa Kazu Oknum Serbisu Migrasaun

Fundasaun Mahein preokupa asaun krime ne’ebé akontese fila-fali iha domingu, foin lalais ne’e,  ne’ebé rezulta joven na’in tolu iha área Comoro no Bebonuk kanek tanba hetan taa husi ema deskoñesidu.

Joven na’in tolu ne’ebé sai vítima hetan taa maka hanesan, JJ, AB no JC iha área Beto Leste, Bai Leste, Suku Madohi, Postu Administrativu Don Aleixo no Suku Bebonuk parte tasi ibun nian.

“Ami husu ba autoridade seguransa atu  ativa fali operasaun “Aplika Lei, Dili Hamatek,” hateten Diretór Fundasaun Mahein, João Almeida, ohin, ba jornalista iha edifísiu FM, Momento, Dili.

Nia dehan, seguransa ne’e iha polisia nia liman, labele husik fali membru Konsellu Polisiamentu Komunitáriu (KPK) maka halo operasaun depois polisia iha fali kotuk.

FM observa katak, krime sira ne’ebé kontinua akontese  iha área Comoro fó impaktu ba movimentu públiku iha tempu kalan.

João hatutan, operasaun patrulla iha dalan públiku no tama sai bairru no suku sira loloos halo rutina, para polisia besik ba povu atu evita númeru krime labele akontese.

Segundu Komandante PNTL Munisípiu Dili, Superintendente Asistente Polisia, Euclides Belo, garante katak, kazu ne’ebé akontese la fó impaktu ba estabilidade, tanba PNTL ho F-FDTL kontinua halo nafatin operasaun.

Jornalista : Eugénio Pereira

Editór       : Francisco Simões

 

HAKEREK NO HATÁN

Please enter your comment!
Please enter your name here