Karta Kondusaun.

DILI, 17 setembru 2019 (TATOLI) – Xefe Departamentu Karta Kondusaun Diresaun Nasionál Transporte Terrestre (DNTT) Ministériu Transporte no Komunikasaun (MTK), Florentina Bento Alves Pereira, relata hahú ohin, DNTT iha Akanunu-Hera emite ona karta kondusaun orijinál ba motorista no kondutór sira.

“Hanesan horisehik ha’u dehan komesa aban (read ohin) DNTT bele emite ona karta kondusaun orijinál, tanba ne’e dezde dadersán to’o meudia, ami komesa emite ona karta kondusaun orijinál ba ema hamutuk ema na’in sianulu-resin-hitu (97)”, dehan Florentina Bento Alves Pereira ba Tatoli via telefone, ohin.

Xefe Departamentu ne’e salienta katak husi númeru ne’e (97) mak DNTT rejista ona no sei sa’e tan tanba motorista no kondutór barak sei bá trata karta ne’e.

“Ita hatene katak iha maluk motorista sira ohin loraik aban-bainrua sei mai foti tanba barak maka durante ne’e sira uza provizóriu de’it, tanba ne’e ami labele serteza ohin loron hira no aban ne’e hira maka mai foti tan”, dehan nia.

Iha sorin seluk, Diretór Jerál Administrasaun no Finansa MTK, Deonísio de Araújo, informa prosesu ba produsaun karta kondusaun orijinál no xapa matríkula husi ministériu konklui ona prosesu no haruka ona ba iha DNTT.

“Kompañia ne’ebé maka manán iha konkursu ba produsaun karta kondusaun no xapa matríkula husi ministériu konklui ona ninian prosesu no ami haruka ona ba iha DNTT dalaruma horiseik no ohin sira hahú halo produsaun hodi halo fornesimentu ba maluk motorista sira”, Deonísio de afirma Araújo.

Notísia relevante : Hahú Aban DNTT Emite Ona Karta Kondusaun Orijinál

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here