Advogadu privadu kompañia Marino Entreprise, Pedro Aparício. Imajen/Hortençio Sanchez

DILI, 17 setembru 2019 (TATOLI) – Advogadu privadu kompañia Marino Enterprise, Pedro Aparício, husu líder nasionál, Kay Rala Xanana Gusmão hodi konsidera netik sira-nia lian, relasiona ho intervensaun iha terrenu.

Pedro Aparício ko’alia lia hirak ne’e tanba iha loron 10 setembru, Xanana Gusmão, sobu lutu ne’ebé kompañia Marino Enterprise tau iha rai disputa, hodi labele impede serbisu kompañia China Harbour.

“Durante ne’e ita-nia maun Xanana nunka rona ami hanesan rai-na’in. Nia rona liu mak China Harbour ne’e. Ami só iha dezentendimentu de’it ka ladún iha intendimentu ne’ebé mak di’ak, maibé ema ne’ebé hanoin aat hodi soran maun Xanana ho ami, lori lia bosok ne’e mak China Harbour ne’e. Tanba, informasaun ne’ebé durante nia hato’o ba maun Xanana ne’e informasaun sala”, nia tenik iha Tribunál Distritál Dili, tersa ne’e.

Notísia Relevante: China Harbour iha Esperansa Tribunál Fó Konsiderasaun Prepara Evidénsia

Advogadu ne’e esplika, rai ne’ebé China Harbour utiliza la’ós rai Governu maibé rai privadu Marino Enterprise nian, ne’ebé sosa ona hosi rai-na’in antigu iha tinan 2017 liubá.

Nu’udar timoroan, nia husu ba Xanana Gusmão atu rona mós sira-nia lian tanba durante ne’e timoroan mak hamutuk.

Nia informa, kona-ba rai área Kaitehu iha parte rua, ne’ebé kompostu hosi rai privadu ho na’in mak Diretór Marino Enterprise, Edencio Soares (Land B) no pertense rai Estadu (Land A).

“Iha 2018 to’o 2019 ne’e, ami mós hatama pedidu ba Ministériu Justisa para halo kontratu arendamentu ho Land A ne’e, rai ida ne’ebé pertense ba Estadu nian. Ne’e mak foho lolon ne’ebé fera dadauk fatuk ne’e. Momentu ne’ebá, ami hatama pedidu no kompañia China Harbour mós hatama pedidu hakarak atu arenda rai ida iha Line A ne’e” nia konta.

Nia hatutan, razaun ninia kliente hatama pedidu ba Ministériu Justisa ba rai refere tanba antes ne’e Marino Enterprise hala’o ona atividade ke’e fatuk iha área Kaitehu no tanba baliza ho rai Estadu.

“Tanba razaun rua ne’e mak ami iha direitu prioridade atu halo kontratu arendamentu ho Governu. Agora, empreza Xineza ne’e mós hatama hotu pedidu katak nia atu halo obra Portu Tibar, entaun nia hatama ona pedidu, maibé Ministériu Justisa mós rejeita ami-nia pedidu. Simu mak China Harbour nia pedidu ne’e. Katak, rai ida Land A ne’e fó arenda ba China Harbour, entaun ami la asseita hodi halo fali rekursu irárkia ba Primeiru-Ministru kona-ba rai ida Land A ne’e. Rai ne’e rai Estadu nian.  La’ós ami-nian. Maibé, Primeiru-Ministru haruka fali dokumentu ne’e mai Ministériu Justisa mak atu rezolve”, dehan Pedro.

Kontratu China Harbour ho Marino Enterprise 

Pedro Aparício konta tan, iha kontratu ne’ebé China Harbour halo ho Marino Enterprise hateten, sei halo arendamentu ho presu espesiál.

Kompañia rua ne’e ko’alia kona-ba kontratu arendamentu no China Harbour mak halo ezbosu kontratu, tanba rekoñese rai ho dokumentu sira maibé to’o ikus mosu dezentendimentu.

Notísia Relevante: China Harbour Simu Ona Karta Atu Kontesta Marino Enterprise

Hosi dezentendimentu ne’e kedas China Harbour taka komunikasaun ho Marino Enterprise maski  tenta komunika nafatin maibé empreza Xineza taka hotu komunikasaun no laiha esplikasaun. 

“Sira só dehan mai ami katak ami lakohi komunika ona ho imi. Imi rezolve ho Estadu ba. Ami só utiliza de’it rai ne’e. Tanba ne’e mak iha jullu liubá, ha’u hatama prosesu ne’e ba Tribunál. Prosesu ne’e dehan providénsia kautelár restituisaun provizória pose. Prosesu ida ne’e maski Tribunál sira féria hela maibé prosesu ne’e tenke la’o nafatin tanba nia natureza ne’e urjente”, nia esplika.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here