Ilustrasaun

DILI, 16 setembru 2019 (TATOLI)-Vise-Ministru Dezenvolvimentu Estratéjiku Saúde, Bonifácio Maukoli dos Reis hateten katak tempu ona atu Timor-Leste loke unidade kardiolojia iha HNGV (Ospitál Nasionál Guido Valadares) tanba durante ne’e pasiente kardiolojia sira haruka de’it ba halo tratamentu médiku iha iHEAL Medical Centre Malázia, Singapura no Indonézia.

Vise-Ministru ba Dezenvolvimentu Estratéjiku Saúde, Bonifácio Maukoli dos Reis.Imajen/Antonio Goncalves

“Ha’u mai vizita iha HNGV ida ne’e haree hamutuk ho ita-nia peritu ida mai husi Malázia doutór David Khoo, ne’ebé mak sai na’in ba iHEAL Medical Center. Ita hatene katak ita-nia pasiente sira ne’e ita haruka ba iHEAL ne’e purvolta 158, ne’ebé mak ho problema fuan no halo ona operasaun ba ema kuaze 58 no restante ne’e ba monta katerizasaun liuliu ba fuan nian,” informa Vise-Ministru Bonifácio Maukoli ba jornalista sira bainhira ramata soru-mutu ho peritu sira husi Kuala Lumpur kona ba planu atu loke tan unidade kardiolojia iha HNGV ba tinan 2020 iha sala junta Médiku HNGV, ohin.

Governante ne’e mós informa katak doutór David, sidadaun Malázia ne’e mós hasoru malu ona ho Primeiru-Ministru Taur Matan Ruak para depois oinsá planeia hamutuk ho diretór ezekutivu sira iha HNGV atu bele inisia no instala ona klínika ba kardiolojia nian no mós unidade ICU nune’e bele ona hahú iha janeiru (2020) nian laran.

Vise-Ministru Bonifácio Maukoli esplika mós katak moras kardiolojia ne’e afeta ba ema ne’ebé mak ho estilu vida nian han di’ak, hemu di’ak no mós hemu álkool, fuma tabaku no ikus mai nia impaktu mak afeta ba fuan. Tanba ne’e, tempu ona atu prevene sedu.

“Se ita hakarak hamriik mesak, hahú agora. Labele hein tan, entaun inisiativa ida ne’e mak ita ko’alia katak la’ós haruka beibeik pasiente sira ba rai li’ur maibé ita mós prepara ona hein tinan lima tinan, sanulu mai ne’e, ita hamriik mesak ona no ita mós bele fó atendimentu ona ba moras fuan iha ita nia rain rasik. Labele dependente nafatin ba ospitál rai li’ur,” nia garante.

Membru governu Oitavu Governu Konstitusionál ne’e informa tan katak planu mestre (master plan) la’o hela maibé ita la bele hein to’o iha ne’ebá. Agora daudaun ita hahú uluk ona edifísiu kardiolojia ne’e, hahú ona la’ós atu halo expansaun maibé ita haree iha laran ne’e ita sobu daudauk ona para instala, hahú ona klínika no ICU (Intensive Care Unit) ka Unidade Kuidadu Intensiva, atu halo konstrusaun ba ICU ne’e halo besik Edifísiu sala operasaun HNGV nian.

Entaun ida ne’e kuandu prontu ona ita instala ona kettler para halo operasaun no planu ne’e komesa iha 2020 no 2021 ita hahú ona instala kettler no ba oin rekursu umanu sira sei mai halo akompañamentu ba ita-nia rekursu sira.

“Ita mós forma ona ekipa atu la’o hamutuk ho sira depois sira akompaña to’o tinan sanulu  mai prontu ona ita halo rasik no sira bele husik ita no sira apoiu rekursu umanu no ekipamentu ba kardiolojia nian,” nia konklui.

Notísia relevante:Doutór Espesiál Singapura Hakarak Kapasita Timoroan Iha Área Kardiolojia

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here