Xefe Ekipa Polisia Nova Zelándia, Sean McManus. Imajen/Eugénio Pereira

DILI, 16 setembru 2019 (TATOLI)-Polisia Nova Zelándia liu husi ekipa Programa Apoiu Polisia Komunitáriu (PAPK) koopera ho Komandu Polisia Munisípiu Dili fó apoiu telefone ho modelu Samsung V5 hamutuk 36 hodi apoiu servisu Ofisial Polisia Suku (OPS) Munisípiu Dili.

Xefe Ekipa Polisia Nova Zelándia, Sean McManus dehan, telefone ne’e PARK oferese hodi ajuda membru OPS na’in 36 para hala’o kontaktu durante servisu atu garante pás iha kada suku hotu, Munisípiu Dili nian.

“Ami fahe telefone hamutuk 36 ne’e ba ita nia membru OPS sira atu halo komunikasaun regulár ba servisu OPS nian iha suku,” dehan  Xefe Ekipa Polisia Nova Zelándia, Sean, ohin,  ba jornalista iha Komandu Polisia, Caicoli, Dili.

Nia dehan, Nova Zelándia kontinua apoiu OPS, tanba foin lalais ne’e sira lansa ona rezultadu peskiza hatudu katak, servisu OPS iha territóriu Timor-Leste hatudu progresu di’ak.

“Ami haree katak, progresu servisu OPS di’ak tebes bazeia ba survey ne’ebé maka Nova Zelándia no TAF halo, ita nia povu apresia, tanba OPS besik tebes sira buka rezolve problema ne’ebé akontese,” tenik nia.

Iha fatin hanesan, Segundu Komandante PNTL Munisípiu Dili, Superintendente Asistente Polisia, Euclides Belo,  hato’o agradese ba PAPK Nova Zelándia  no Fundasaun Ázia (TAF-sigla Inglés) durante ne’e akompaña no fó apoiu másimu ba servisu OPS.

“Agradese tebes ba PARK sira suporta ita nia polisia too estabelesimentu Ofisial Polisia Suku iha Munisipiu Dili no ohin sira fó tan apoiu telefone 36 ba OPS ne’ebé harii tiha ona tuir totál Suku iha kapitál Dili nian,” dehan Superintendente Asistente Polisia, Euclides.

Nia dehan, durante ne’e OPS sira simu mós motór no laptop hodi bele fasilita servisu OPS Dili nian.

Hafoin enkontru, Polisia Nova Zelándia no Komandante OPS Munisípiu Dili, Inspetór Xefe Helena das Dores Alves realiza semináriu hodi avalia servisu OPS durante selebrasaun festa konsulta populár 30 Agostu 2019 liubá koopera ho Konsellu Polisiamentu Komunitáriu (KPK) garantia seguransa la’o di’ak tebes.

“Ita agradese ba servisu OPS durante selebrasaun festa konsulta populár 30 Agostu 2019 liubá la’o di’ak tebes,” tenik Euclides.

Nia hatutan, liña Komandu PNTL agradese tebes ba OPS  reprezenta Komandu PNTL besik liu povu no autoridade suku no joven sira atu buka rezolve problema ruma karik mosu koopera ho KPK  hakotu problema ho unidade umana hodi evita konflitu labele mosu.

Iha parte seluk, Euclides dehan, Komandu PNTL Dili  estabelese ona KPK iha suku 22 no falta fatin suku 12 maka seidauk estabelese no tuir planu iha tempu besik sei fó pose ba membru KPK sira.

“Ita estabelese ona KPK iha suku 22 no falta suku 12 maka seidauk, maibé ami iha planu fulan oin mai sei estabelese too totál suku 36 iha Dili inklui kria formasaun ba membru KPK sira,” nia esplika.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here