Komisáriu KAK, Sergio Hornay. Imajen/António Gonçalves.

DILI 16 setembru 2019, (TATOLI) – Komisaun Anti Korrupsaun (KAK) husu adisionál rihun $800 iha reuniaun Komité Revizaun Orsamentu Polítika (KROP).

Komisáriu KAK, Sérgio Hornay, hatete husu adisionál ho razaun hakarak reforsa liután KAK, nune’e bele estabelese polítika liuliu iha área prevensaun no investigasaun kriminál iha 2020.

“Ami iha adisionál ho montante rihun $800 ba iha rubrika orsamentu ba saláriu, bens no servisu, no kapitál menór. Ami iha adisionál ho razaun mai ho lójika kada rasiosíniu ida ne’ebé mak mai hosi ami-nia tetu fiskál nian tanba iha tinan 2020 sei aumenta tan kuadru pesoál balu hodi reforsa liután ba iha espesialista anti korrupsaun nian. Entaun, iha saláriu husu hamutuk rihun $48 atubele apoia tan”, afirma Sérgio Hornay ba Tatoli hafoin partisipa reuniaun KROP iha Ministériu Finansa (MF), Aitarak-Laran, ohin.

Aléinde ne’e iha mós bens no servisu nian presiza halo komplementariedade ba iha ekipamentu anteriór signifika katak presiza halo modernizasaun. Nune’e mós bá viajen lokál ne’ebé kompleta rutina serbisu tantu iha área prevensaun, investigasaun kriminál no mós iha área kooperasaun instituisaun servisu apoia kooperasaun nian.

“Kooperasaun mós presiza orsamentu uitoan para bele fó apoia ba iha servisu rai-laran no kooperasaun iha rai-li’ur, tanba ne’e maka husu adisionál balu. Iha kapitál menór tanba presiza mós buat balu apoia liuliu iha akizisaun ekipamentu hanesan komputadór”, dehan Sergio Hornay.

Eis Diretór Defensór Públiku ne’e dehan, montante orsamentu ne’ebé husu hanesan proposta de’it, maibé ekipa tékniku KAK nian sei halo serbisu téknikamente ho MF no UPMA para halo armonizasaun ba iha tetu orsamentu liuhosi perspetiva polítika Governu nian.

“Maibé buat ne’ebé ami hatuur labele afeta ba despeza korrente nune’e funsionamentu instituisaun bele la’o di’ak”.

Pakote fiskál ne’ebé MF atribui ba KAK hamutuk millaun $1-resin.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here