Logotipu Alola Foundation

DILI, 16 setembru 2019 (TATOLI)- Fundasaun Alola liuhusi HALIKU (Ha’u Hili Kura)  oferese formasaun ba profisionál saúde sira iha Ospitál Nasionál Guido Valadares (HNGV-sigla portugés) hamutuk ho pesoál saúde sira husi sentru saúde haat iha Dili, kona-ba jestaun ba kanek sira, liuliu ba kankru susun.

“Objetivu mak oinsá atu hasa’e konsiénsia, hasae mós sira nia skill (abilidade) oinsá atu kuidadu kanek liuliu ba sira ne’ebé mak moras kankru depois operasaun no mós tau-matan ba pasiente sira ne’ebé mak alta husi ospitál durante sira iha uma oinsá atu tau-matan ba sira no mós oinsá hasae konsiénsia ba sira para halo detesaun sedu ba sira-nia aan rasik liuliu ezaminasaun ba sira-nia susun rasik,” informa Diretora Interina Fundasaun Alola, HALIKU, Maria Imaculada Guterres ba jornalista sira iha HNGV, ohin.

Nia esplika, formasaun ne’e iha pakote tolu, entaun nia datoluk ne’e sei halo iha Fundasaun Alola rasik, iha sesta no sábadu. Agora  ida ne’e fó kapasitasaun ba sobrevivente hanesan moras kankru susun sira no mós voluntáriu sira, haree liu ba oinsá atu kuidadu pasiente sira ne’ebé mak sofre ona ba moras kankru no mós haree sira,  tau-matan ba sira durante iha uma, akonsellamentu. “Buat sira ne’e ami sei fornese,” nia subliña.

Diretora Interina, Maria Imaculada Guterres informa tan katak Fundasaun ALOLA koordena hamutuk ho Komité kankru susun nasionál iha HNGV no formadór sira ne’e mai husi Malázia no Austrália.

Fundasaun ALOLA identifika moras kankru, hahú iha  tinan 2014 to’o agora no kura ona moras balun hamutuk atus ida sanulu resin lima ne’e, kankru susun ninian ne’ebé transfere mai iha HNGV husi  pasiente sira ne’e iha na’in hitu mak pozitivu m kankru susun.

Entretantu, semináriu ne’e hetan abertura husi Vise-Ministra Saúde Primária, Elia dos Reis Amaral no partisipa husi médiku, enfermeiru, parteira sira iha HNGV inklui mós pesoál saúde husi Sentru Saúde haat, iha Dili laran.

Notísia relevante:Pasiente Kankru Susun Iha TL 345, Alito: “Pasiente Sira Tarde Halo Diagnóstiku”

Jornalista :Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here