Joven ida hetan taa husi ema deskoñesidus iha domingu kalan (15/09/2019), iha Adeia Beto Leste, Suku Madohi, Postu Administrativu Don Aleixo, Munisípiu Dili. Imajen/Média Sosial

DILI, 16 setembru 2019 (TATOLI)-  Ema deskoñesidu taa kanek joven na’in tolu iha area Comoro ho Bebonuk iha Domingu kalan (15/09/2019).

Joven na’in tolu ne’ebé sai vítima hetan taan maka hanesan, JJ, AB no JC iha área Beto Leste, Bai Leste Suku Madohi, Postu Administrativu Don Aleixo no Suku Bebonuk parte tasi ibun nian.

Segundu Komandante PNTL Munisípiu Dili, Superintendente Asistente Polisia, Euclides Belo, rekoñese kazu taa ne’e joven na’in tolu akontese simultánea (serentak), iha oras tuku ualu kalan, no parte PNTL too agora seidauk kaptura suspeitu, tanba hafoin akontesimentu suspeitu sira halai kedas.

“Agora daudaun ekipa investigasaun kriminál rekolla ona dadus, ha’u seidauk bele fó sai lai kronolojia kazu ne’e oinsá. Tanba rezultadu investigasaun husu ba vítima rasik seidauk remata, tanba vítima na’in tolu agora sei hala’o hela tratamentu iha ospitál,” informa Euclides Belo, ohin, ba jornalista iha Komandu PNTL, Caicoli, Dili.

Euclides Belo dehan, tuir informasaun ne’ebé PNTL rekolla suspeitu sira taa vítima joven ne’e iha parte kanoruk rezulta kanek makas.

Nia dehan, akontesimentu ne’e la fó impaktu ba situasaun seguransa iha Dili, tanba PNTL no F-FDTL kontinua servisu hamutuk garante estabilidade seguransa.

Iha parte seluk, Xefe Aldeia Beto Leste, Adriano Moniz rekoñese kronolojia kazu ne’e akontese derrepente de’it, tanba joven ida ne’ebé hetan taan tuur hela ho nia kolega sira iha estrada ibun, derrepente ema deskoñesidu lori arma kro’at taa kedas vítima nia ulun rezulta kanek makas iha parte ulun.

“Kazu Beto Leste ne’e akontese derrepente de’it, tanba ema deskoñesidu ne’e taa hotu halai kedas ami mós konsege identifika, no husu ona ba parte PNTL para investiga kazu ne’e,” dehan Adriano ba TATOLI liu husi telefone.

 Entretantu, Komandu PNTL rasik hatún ona ekipa koordenada hamutuk ho Ofisial Polisia Suku (OPS) no Konsellu Polisiamentu Komunitáriu (KPK) hodi investiga kazu ne’e.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here