Tribunal Distritál Dili.

DILI, 16 setembru 2019 (TATOLI)–Tribunal Distritál Dili (TDD), ohin, loke prosesu julgamentu ba  Xineza nain tolu ho inisiál LBH, LHJ no MF, ne’ebé deskonfia komete krime tráfiku umanu ho tipu esplorasaun seksuál.

Akuzasaun ne’ebé Ministériu Públiku aprezenta ba tribunal katak, iha loron 01 dezembru 2016, tuku 16:00 lokraik besik, loza ida iha area eskola São Paulo VI,  Polisia Investigasaun Kriminál kaptura flagrante delitu arguido na’in tolu ho pesoál xineza nian tolu deskoñesidu iha hela fatin prostituisaun hodi kontrata vida.

Husi atividade ne’e arguida LBH mak prepara fatin (uma), tanba arguida aluga rai iha fatin refere, uma ne’ebé arguido fó hamutuk kuartu 6 ne’ebé ho nia sala luan, no loke mós salon iha laran hodi atende ema sira ne’ebé mak halo atividade seksuál.

Kada atividade arguido sira husu atu halo pagamentu kada ema ida ho presu U$30.00, no kada loron arguido sira rekolla osan husi vítima deskoñesidu ne’ebé fila ona ba nasaun Xina hamutuk $400.00.

Arguido sira halo atividade negósiu loke loza One dolar shop  mós laiha dokumentu legal, sira mós uza de’it visa turista. Tanba ne’e, Ministériu públiku akuza arguido sira ho krime esplorasaun seksuál hosi artigu 174 ne’ebé previstu iha lei kódigu Penal Timor Leste nian.

Depois le sai provas akuzasaun, tribunal husu ba arguido sira atu konfesa faktu, maibé arguido na’in hat hili dalan nonook hodi lakohi atu fó komentáriu. Tanba ne’e, tribunal diretamente konfirma ba vítima ho naran XY no HFF, maibé la disponivel, tanba vítima na’in rua ne’e fila ona ba sira nia rain.

Audiénsia ne’e prezide husi juis koletivu, kompostu husi juis prezidente Edite Palmira, adjuntu juis João Ribeiro no Juis estajiáriu. Parte Ministériu Públiku reprezenta prokuradoria Lidya Soares, no arguido sira hetan asisténsia legal husi defensór Públiku, Marçal Mascarinhas.

Jornalista : Domingos Piedade Freitas

Editór        : Francisco Simões

HAKEREK NO HATÁN

Please enter your comment!
Please enter your name here