Tabela klasifikasaun provizóriu. Imajen espesiál

MALIANA, 15 setembru 2019 (TATOLI) – Ekipa AS Ponta Leste susesu hakoi mehi furak ne’ebé armada Assalam mehi, no hakarak duni tuir armada Lalenok United FC ne’ebé daudauk ne’e kandidatu forte iha kampiaun Liga Futeból Amadora (LFA) époka 2019.

Derota ne’ebé Assalam hetan iha jogu domingu ne’e, halo ekipa ne’e falla totál atu hakbesik-aan ba Lalenok maski sei husik hela jogu rua.

Vitória Ponta Leste liuhosi golu ne’ebé prodúz hosi jogadór, Daniel Donkor, iha minutu 49, Veh Donald 76, Anizio Correia 84, enkuantu golu úniku Assalam hatama hosi Filipe Borges iha minutu 69.

Entretantu, iha loron ne’ebé hanesan, jogu ida hala’o iha estádiu munisipál Dili entre ekipa Lalenok United FC VS AD SLB Laulara rejultadu 4-2.

Golu Lalenok hatama hosi, Fabio Christian Cotinhi iha minutu 19, Yohanes Kapitan 25, auto golu jogadór SLB Tonito Belo 58, Italo Pimentel 89, golu SLB hatama hosi Paulo Gally 42 no Jordão da Silva 85.

Nune’e, hosi vitória ne’ebé Lalenok hetan, sei lori ekipa refere nia-ain sorin tama ona iha títulu kampiaun LFA époka 2019 maski sei hela jogu rua.

Ekipa refere hakat-ain besik dalan kampiaun tanba nia pontu soe dook ona hosi klube hitu seluk, enkuantu Boavista FC Timor mak besik maibé sei hela pontu haat mak foin toman Lalenok.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here