Diákonu Adérito da Costa Vilar Moreira hakneak hodi halo promesa ba Bispu Don Norberto do Amaral, katak, nia hakarak duni ho Nai Maromak nia tulun atu simu Sakramentu Órden Sacerdotál. Foto TATOLI/Cipriano Colo

MALIANA, 14 setembru 2019 (TATOLI) – Diákonu Adérito Vilar Moreira simu Ordenasaun Sacerdotál hosi Bispu Dioseze Maliana, Don Norberto do Amaral, iha selebrasaun festa ezaltasaun Santa Krúz, Padroeiru Parókia Santa Krúz Maliana, sábadu ne’e.

Iha omília, Don Norberto kópia São Paulo nia karta ba Sarani sira iha Filipo ne’ebé dehan, “Nia haraik-aan hodi halo tuir de’it to’o mate no mate iha Krúz”.

Liafuan badak ne’e, Don Norberto uza nu’udar reflesaun ba festa ezaltasaun no Ordenasaun Presbiterál ho liafuan tolu mak hanesan umildade, obediénsia no sakrifísiu.

Iha esplikasaun, liafuan umildade katak, haraik-aan, la foti-aan, buka hatene saida mak sentidu moris iha mundu rai klaran, liliu atu serbí maun-alin sira.

Liafuan obediénsia katak ema ne’ebé obediente nia iha dom ida ne’ebé boot tebes, hodi halo tuir de’it Maromak nia hakarak no la’ós halo tuir ema nia hakarak.

Liafuan sakrifísiu katak, mate, hamate kaan sira, hamate gostu sira, hamate prazer sira, nune’e ema moris labele sabraut.

Bispu hateten, personalidade Jesus Kristu nian, Nia halo buat tolu ne’e kompletu, Nia haraik-aan hodi mate iha Krúz, tanba ema nia hahalok aat sira.

Hosi reflesaun ne’e, Don Norberto hakarak bolu atensaun ba Padre no Diákonu sira, katak, Padre no Diákonu sira prezente iha sarani sira-nia leet reprezenta Kristu, atu halo tuir saida mak Kristu halo. Katak, lor-loron Padre sira tenke hatudu ezemplu di’ak, moris loloos, ko’alia ba sarani sira kona-ba buat loos, tau aas Maromak nia hakarak hafoin ema-nia hakarak.

Don Norberto husu Padre foun atu kaer metin atitudi, umildade, obediente no sakrifísiu, tenke sai sinál unidade iha sarani sira-nia leet, bazeia ba lema Ordenasaun Sacerdotál ne’ebé dehan, “Nia mak haruka ha’u mai” (Jo.8, 42b).

Iha ritu Ordenasaun Presbiterál hateten katak bainhira temi kona-ba sakramentu órden, ko’alia kona-ba Bispu, Nai-Lulik no Diákonu sira.  Ida ne’e mak hanaran órden presbiteru sira-nian, no sira ne’e simu kbiit sacerdósiu atu sai Kristu Nai-Lulik Boot no rohan laek nia futar illas ne’ebé haraik iha povu nia leet.

Simu sakramentu órden katak, sai Nai-Lulik, tanba sakramentu ne’e fó kbiit, kna’ar mistériu sagradu nian, atu hala’o no selebra Eukaristia hodi haklaken Maromak nia futar liafuan.

Hafoin misa, Januario Pires Vilar Moreira hanesan reprezentante família ordenadu espresa ninia sentimentu ksolok tanba konsidera ordenasaun ne’e nu’udar grasa vokasaun nian ba uma lisan DaceUbun, no fo obrigadu ba Don Norberto ne’ebé fó sakramentu órden ne’e.

Nia husu ba Padre foun atu banati tuir misaun Jesus Kristu nian liliu umildade, obediénsia no sakrifísiu.

Entretantu, Padre Adérito ne’ebé foin simu ordenasaun promete sei halo tuir no husu ba família inklui sarani sira atu reza ba nia iha misaun foun ne’ebé foin hahú, atu bele la’o to’o rohan.

Padre Adérito da Costa Vilar Moreira moris iha Suku Lahomea, Postu Administrativu Maliana, Munisípiu Bobonaro iha 31 agostu 1982, hosi aman Abbas Setiadi no inan Teresinha da Costa Moreira, ho nia maun-alin na’in 11, mane na’in haat no feto na’in hitu.

Padre Adérito hahú estuda filozofia iha Semináriu Interdiosezanu São Pedro no São Paulo Fatumeta, iha tinan 2009 to’o 2012.

Tinan 2014-2015, kontinua estuda teolojia iha Institutu Superiór Filozofia no Teolojia Dom Jaime Garcia Goulart Fatumeta, Dili.

Iha 6 setembru 2018, simu Ordenasaun Diakonál hosi Bispu Dioseze Maliana, Don Norberto do Amaral iha Parókia Nosa Senhora de Fátima Suai.

Iha 14 setembru 2019, simu Ordenasaun Sacerdotál hosi Don Norberto do Amaral, ho nia lema, “Nia mak haruka ha’u mai”, (Jo.8, 42b).

Dioseze Maliana ninia eresaun Kanónika iha 30 janeiru 2010, ho bula AD PERPETUAM REI MEMORIAM hosi Papa Bento XVI ho nia Parókia ne’ebé pertense ba Munisípiu Liquiçá, Bobonaro no Covalima.

Dioseze ne’e iha ninia sede iha Katedrál Sagrada Coração de Jesus Maliana, ne’ebé serbí populasaun ida ho abitante 230,175, iha ne’ebé 228,741 Katóliku ho persentájen 99,4.

Oras ne’e dadaun, Dioseze Maliana iha ona Padre Diosezanu hamutuk 20 resin.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here