Bandeira Timor-Leste

NORTE IRLANDA, 14 setembru 2019 (TATOLI) – Timoroan sira iha Norte Irlanda, foin lalais ne’e, selebra Tinan 20 Referendu (30 agostu 1999-30 agostu 2019) ho misa. Maski sira hela dook hosi família maibé la haluha komemora istória autodeterminasaun ne’e.

Mehi hetan moris di’ak, mehi hetan serbisu permanente, mehi fornese edukasaun ho kualidade ba oan-sira, obriga timoroan barak la’o buka serbisu iha ema-nia rai.

Nune’e, iha 30 agostu kalan, timoroan barak mak ba misa iha Igreja St. Patrick’s Dungannon, hodi halo orasaun no reflesaun ba momentu istóriku iha tinan 20 liubá kotuk, ne’ebé povu hosi idade 17 to’o ferik-katuas, husik aldeia sira mamuk hodi hakat ho korajen ba fatin votasaun hodi hili futuru ida ne’ebé di’ak liu, vota ba ukun-aan.

Reflesaun ne’ebé halo, hahú kedas ho vizita Padre João Inocêncio Piedade ba Dungannon iha 16 marsu 2019, hodi halo palestra ho tema “Timor-Leste, dezafíu no perspetiva kona-ba Tinan 20 Referedu no Independénsia, ne’ebé karun tebes, sosa ho ema 200.000 resin nia ruin no raan”. Tanba ne’e, loron 30 Agostu 1999 konsidera hanesan povu nia loron no loron Unidade Nasionál.

Atividade Desportivu Referendum Cup

Entretantu, iha loron tuir mai (31/8), timoroan sira halibur malu iha People Park Portadown hodi asiste jogu finál “Referendum Cup” entre Rusa-Fuik vs Foin-Sa’e FC, ne’ebé sai ona tradisaun iha sidade Portadown dezde tinan 2017.

Tuir komisaun organizadora, atividade desportiva tinan ne’e nia objetivu mak transmiti istória no valór Tinan 20 Referendu ba foinsa’e sira liuhosi konvíviu hanesan rona múzika tétun no atividade desportiva.

Kontributora: Dalia Kiakilir
Editór: Xisto Freitas

HAKEREK NO HATÁN

Please enter your comment!
Please enter your name here