Komisaun organizadora aprezenta estatutu no regulamentu internu TAIS ba membru sira. Imajen/Dalia Kiakilir

NORTE IRLANDA, 14 setembru 2019 (TATOLI)Timoroan sira iha Norte Irlanda konkretiza ona sira-nia mehi, hodi harii organizasaun Timorese Association Inclusive Support (TAIS), ne’ebé hanesan organizasaun komunitária.

Organizasaun ne’ebé harii iha loron 7 setembru 2019 ne’e, hanesan organizasaun naun lukrutivu ho karíz no karidade, hodi hakbi’it no suporta timoroan ka membru hirak ne’ebé iha hela situasaun risku nia laran iha Norte Irlanda no hamaluk ema hosi kultura seluk.

Nune’e mós, fó apoiu apropriadu ba membru sira, nune’e bele promove inkluzaun sosiál iha sosiedade dijitál, lokál no globál ohin loron nian.

TAIS uza sigla ne’ebé kesi lian rua, tétun ho inglés, ba ida de’it.

Organizasaun ne’e halibur hosi timoroan sira ne’ebé mai hosi sidade oioin hanesan Dungannon, Lurgan, Cookstown, Craigavon, Magherafelt no Portadown, ne’ebé ho esperiénsia la hanesan, maibé ho objetivu atu buka serbisu iha ema-nia rai.

Iha tempu naruk, TAIS hakarak kontribui ba dezenvolvimentu ekonómiku no sosiál Timor-Leste nian.

TAIS nia kna’ar mak buka solusaun ba dezafíu ne’ebé membru sira hasoru no ezije responsabilidade, korajen no determinasaun individuál no koletiva.

Haree ba ikus ne’e, iha timoroan barak mak tama iha Norte Irlanda ho Pasaporte Repúblika Demokrátika Timor-Leste (RDTL), ne’ebé tuir lei ka eskema tenke membru família hosi Uniaun Europeia (UE) nian (família raan ida, ema hosi rejiaun EU, ema ne’e nia feen, la’en, ka oan rasik bele tama hodi hela hamutuk).

Eleisaun Prezidente TAIS

Iha eleisaun, Felix de Jesus eleitu hanesan Prezidente TAIS ho durasaun tinan ida no sei renova ba periúdu hanesan liuhosi Asembleia Jerál Anuál tuir estatutu no regulamentu internu haruka.

“Obrigadu ba konfiansa. Ita hamutuk tane aas TIMOR ho TIMOROAN, no tulun malu tuir filozofia Husi Ita Ba Ita, ka serbi ema hotu tuir prinsípiu: naun-partidáriu, naun-relijiaun no naun-rasizmu”, tenik Felix de Jesus, hafoin hetan fiar lidera TAIS, foin lalais ne’e, iha Norte Irlanda.

Eleisaun ne’e la’o ho di’ak, la haree ba koor polítika, rejiaun, munisípiu, bairru, knua, lian ka lisan, maibé ida-idak vota ho hanoin ida de’it, “Hamutuk buka solusaun ba ita-nia problema rasik tuir slogan TAIS nian”.

Eleisaun ne’e istóriku tebes ba timoroan sira iha Norte Irlanda, tanba eleisaun ne’e rasik kria espetativa  aas tebes iha membru sira-nia neon katak prezidente eleitu ho ninia ekipa bele tulun rezolve sira-nia problema urjente, hahú kedas ho pasaporte expiradu, British Exit (Brexit), karta kondusaun, língua no seluk-tan, inklui bele lori aspirasaun membru sira-nian ba to’o Embaixada no Governu Timor-Leste.

Nune’e mós ezije timoroan hotu iha tasi-balun (diáspora) nia direitu ne’ebé konsagra ona iha Konstituisaun (Estadu iha obrigasaun proteje no tau-matan ba nia sidadaun sira iha diáspora ka rai li’ur).

Kontributora: Dalia Kiakilir

Editór: Xisto Freitas

HAKEREK NO HATÁN

Please enter your comment!
Please enter your name here