MNEK enkontru kortezia ho Vise-Prezidente ba Polítika no Seguransa Konsellu Reprezentante Populár Indonézia, Fadli Zon, Xefe Komisaun V Parlamentu Nasionál Repúblika Indonézia, Fary Djemy Francis akompañadu husi Embaixadór Indonézia mai Timor-Leste, Sahat Sitorus. Foto: MNEK

DILI, 13 Setembru 2019 (TATOLI)-  Ministériu Negósiu Estranjeiru no Kooperasaun, Dionísio Babo Soares hetan vizita kortézia husi Vise-Prezidente ba Polítika no Seguransa Konsellu Reprezentante Populár Indonézia, Fadli Zon, Xefe Komisaun V Parlamentu Nasionál Repúblika Indonézia, Fary Djemy Francis akompañadu husi Embaixadór Indonézia mai Timor-Leste, Sahat Sitorus, hodi diskute kona-ba asuntu importante husi atividade kooperasaun entre Timor-Leste (TL) ho Repúblika Indonézia  hodi hametin liután relasaun entre nasaun rua ne’e.

Ministru Dionísio Babo Soares  informa katak vizita Vise-Prezidente ba Polítika no Seguransa Konsellu Reprezentante Populár Indonézia, Fadli Zon, Xefe Komisaun V Parlamentu Nasionál Repúblika Indonézia, Fary Djemy Francis ne’e atu haree situasaun nune’e mós relasaun balun ne’ebé akontese.

“Ami diskute buat lubuk ida. Kooperasaun entre nasaun rua, relasaun amizade nasaun rua nian,  valór relasaun ekonómika no mós  relasaun povu ba povu. Tanba ita-nia governu mós aprova ona viza livre durante fulan ida, ne’e para bele iha relasaun di’ak liután em termos de ekonómia, liuhusi fronteira terrestre no maritime,” hateten Ministru Dionísio Babo Soares ba jornalista sira iha edifisiu MNEK, Praia dos Coqueiros, Sesta (13/09/019).

Iha enkontru ne’e Ministru Dionísio Babo Soares realsa ba Vise-Prezidente ba Polítika no Seguransa Konsellu Reprezentante Populár Indonézia, Fadli Zon, Xefe Komisaun V Parlamentu Nasionál Repúblika Indonézia, Fary Djemy Francis ne’e kona-ba kestaun fronteira; fronteira marítima no terrestre.

“Pois hau mós ko’alia sobre kestaun fronteira terrestre nian, hau mós husu ba nia  hanesan membru parlamentu atu bele dudu ezekutivu para oinsá bele rezolve demarkasaun fronteira maritima ho indonézia,” haktuir governante ne’e.

Iha biban ne’e, Ministru Negósiu Estranjeiru no Kooperasaun, Dionísio Babo Soares haktuir tan katak Indonézia mós kontenti ho ita-nia relasaun amizade.

“Nia sente nia bem recebido tanba valoriza tebes relasaun pais  rua. Ho Ida ne’e Ita tenke iha relasaun di’ak nafatin hodi fasilita interese, liuliu ba ita iha interese nasionál, se liuliu politíka boaviziñansa, relasaun tama ASEAN nian, kontextu geopoíitika, geoekonómia nian”.

Governante ne’e esplika, hanesan parte ekonómia nian ita-nia importasaun maka’as liu mai husi indonézia. “Tanba ne’e hau hanoin relasoins a nivél nasaun tenke mantein para iha dezenvolvimentu ne’ebé abranja ba área seluk,” dehan ministru timoroan ne’e.

Ministru Negósiu Estranjeiru no Kooperasaun, Dionísio Babos Soares informa mós katak iha enkontru ne’e sira mós diskute planu atividade ne’ebé maka sei implementa hanesan atu kria eskola akadémia futebol iha Atambua, nune’e mós planu atu fasilita transporte terrestre bele ba liu no mai liu  sem la’o hodi ba troka kareta. No ida ne’e aranja tenke liu husi alfándega no imigrasaun nian atu nune’e kareta bele tama sai liu.

“Señór Fary maske nia Prezidente Komisaun 5 nian iha MPR ho DPR maibé nia mós husi NTT. Tanba ne’e, nia mós interese atu dezenvolve área nee maka’as,” konklui Ministru Dionísio Babo Soares.

Jornalista  :Nelia Borges

Editór        : Rafy belo 

HAKEREK NO HATÁN

Please enter your comment!
Please enter your name here