Husi karuk, Sekretáriu Estadu Komunikasaun Sosiál, Merício Juvinal dos Reis "Akara", Prezidente TATOLI. I.P, José da Costa, Reprezentante Kompañia Telemor F. Lda, no Prezidente CCI-TL, Óscar Lima, hasai foto hamutuk hafoin entrega sertikadu ba manán-na’in ba Central Bank Award 2019, iha ámbitu selebrasaun aniversáriu BSTL ba daualuk ne’ebé hala’o iha Otél Timór, Sexta (13/9/2018). Imajen TATOLI/Antónia Maia Gusmão.

DILI, 13 setembru 2019 (TATOLI) – Banku Sentrál Timor-Leste (BSTL) hili Ajénsia Notisioza Timor-Leste TATOLI, I.P sai vensedór ba BSTL Award 2019. Prémiu ne’e atribui hodi rekoñese ba kontribuisaun notísia informativa sira kona-ba Setór Finanseiru iha Dezenvovimentu Timor-Leste nian.

Manan-na’in ba Central Bank Award 2019 ne’e anunsia hosi Governadór BSTL, Abraão de Vasconselos.

“Ha’u anunsia ofisiál katak manán-na’in ba instituisaun finanseira ne’ebé kontribui mak Telemor F. Lda, no manán-na’in ba mídia ho kategoria eselente mak TATOLI”, Governadór BSTL fó sai iha ámbitu selebrasaun aniversáriu BSTL nian ba daualuk ne’ebé realiza iha Otél Timór, ohin.

Iha fatin hanesan, Vise-Governadór BSTL hanesan mós Prezidente Juri ba Central Bank Award tinan ne’e, Venancio Alves Maria, informa depois de liuhosi diskusaun ne’ebé kle’an no prosesu naruk no nu’udar indika ona iha inaugurasaun Central Bank Award iha 2017 ne’ebé mak Governadór Jerál anunsia ona katak sei iha kategoria rua.

“Ba Central Bank Award Out Standing nu’udar rekoñesimentu ne’ebé previléjiu tebes no só fó de’it iha méritu espesiál ruma no iha mós kategoria eselente ne’ebé sei fó kada tinan”, Prezidente Juri ne’e relata.

Hodi hatutan tinan ida ne’e (2019), Banku Sentrál depois konsidera ho kuidadu deside estende Sentrál Award ida ne’e ba mós mídia. Nune’e ba mídia sira kontribui iha hakerek notísia sira ho kualidade aas hodi fasilita públiku komprende di’ak liután dezenvolvimentu setór finanseiru iha Timor-Leste.

Depois konsidera ho kuidadu Banku Sentrál deside hodi fó Central Bank Award tinan 2019 ho kategoria eselente ba instituisaun teknolojia finanseira ida. Desizaun ida ne’e bazeia ba inisiativa instituisaun ida ne’e iha setór finanseiru ho méritu rekoñesimentu públiku aas, ne’e inklui inovasaun iha estabelesimentu iha teknolojia finanseira foun ne’ebé iha períodu tinan ida nia laran estabelese ona ajente hamutuk 395 iha munisípiu hothotu inklui RAEOA ho postu administrativu balu ho kuaze 2 mil kliente ativu ne’ebé rezulta kliente sira-nia asesu boot liután iha produtu no servisu finanseiru hodi kontribui ba programa inkluzaun finanseira iha Timor-Leste.

“Konsidera ho kuidadu Banku Sentrál mós deside hodi fó Central Bank Award 2019 ho kategoria eselente ba instituisaun mídia ida ne’ebé halo kontribuisaun ba desenvolvimentu setór finanseira iha Timor-Leste. Desizaun ida ne’e bazeia ba instituisaun ida ne’e nia esforsu no kontribuisaun hodi hakerek notisia informativu ho kualidade aas tuir Banku Sentrál nia observasaun ne’ebé influensia no fasilita públiku komprende di’ak liután dezenvolvimentu setór finanseiru iha Timor-Leste”, afirma Venancio Alves Maria.

Prezidente TATOLI, I.P Agradese BSTL

Iha biban ne’e, Prezidente Ajénsia Notisioza Timor-Leste TATOLI, I.P, José da Costa, agradese tebes BSTL ba prémiu ne’e.

“Prémiu ne’e ligadu ba jornalista sira hotu tanba sira servisu maka’as mak ohin loron hodi hetan. Agradese mós ba ema hotu liuliu ba fonte sira ne’ebé sempre fó informasaun ba TATOLI, tanba notísia ne’ebé hakerek la’ós tanba jornalista sira de’it mak bele hakerek, más tanba mós fonte sira-nia kontribuisaun ba hirak ne’ebé kontribui ona informasaun liuliu hetan biban atu entrevista ho TATOLI. Ita-boot sira hotu kontribui ba prémiu ida ne’e, tanba la’ós ho kontribuisaun sira ne’e hotu ami sei labele hetan prémiu ne’e”, dehan Prezidente TATOLI I.P.

Dirijente másimu TATOLI ne’e argumenta, prémiu ne’e hanesan dezafiu foun ba TATOLI atubele mantén kualidade, ritmu di’ak liu.

“Hanesan ajénsia Estadu ida nafatin hatudu iha prátika servisu sira ne’ebé bele asegura kualidade notísia no ha’u konsidera ida ne’e pasu ida foun atu kontinua mantén bá oin, ha’u lori ekipa TATOLI hato’o agradese ua’in no obrigadu barak ba Banku Sentrál”, katak.

Notísia relevante : BSTL Halo Doasaun Raan ba Ema Ne’ebé Presiza Iha Aniversáriu Daulauk Nian

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here